Жүдо бөхийн Улаанбаатар их дуулга тэмцээн өнөөдөр гурав дахь өдрөө хүнд жингийн барилдаануудаар үргэлжлэн явагдаж байна.  

Хоёр өдрийн дараах байдлаар манай бөхчүүд хоёр алт, гурван мөнгө, дөрвөн хүрэл медаль хүртсэн амжилтаар багийн дүнгээр дэд байранд бичигдэж байна. Тэгвэл манай өмнө гурван алт, нэг мөнгө, нэг хүрэл медаль хүртсэн амжилтаар Япон улсын баг, тамирчид бичигдэж байна. Өчигдөр эрэгтэйчүүдийн -73кг жинд "Токио-2020" олимпын хүрэл медальт ОУХМ Ц.Цогтбаатар мөнгөн медаль хүртэж багийнхаа медалийн тоог нэмсэн юм. Эхний өдөр медаль хүртсэн тамирчдын мэдээллийг ЭНД дарж үзнэ үү. 

Тэмцээний сүүлийн өдөр буюу өнөөдөр уламжлал ёсоор эрэгтэй -90кг, -100кг, +100кг, эмэгтэй -78кг, +78кг жингүүдийн барилдаан явагдаж байгаа ба манай улсаас 19 бөх зодоглож байна. Яг одоогийн байдлаар дараах бөхчүүд медалийн төлөө болон дагах барилдаанд барилдахаар тунаж үлдээд байна. 

• Эмэгтэйчүүдийн +78кг жингийн алтан медалийн төлөө А.Адъяасүрэн 
• Эмэгтэйчүүдийн +78кг жингийн хүрэл медалийн төлөө Д.Номинзул
• Эмэгтэйчүүдийн -78кг жингийн мөнгөн медалийн төлөө Б.Эрдэнэт-Од
• Эмэгтэйчүүдийн -78кг жингийн дагах барилдаанд Б.Ням-Эрдэнэ, О.Хүслэн нар хоорондоо 
• Эрэгтэйчүүдийн -100кг жингийн дагах барилдаанд Б.Гончигсүрэн тус тус үлдээд байна.