Өнгөрөгч онд ONE Championship холбоонд хоёр дахь ялалтаа байгуулсан Ширэн бээлий, Mongolian Top Team багийн гишүүн Ц.Амарсанаагийн ээлжит тулааны тов гарчээ.
MGL-1 тулааны аварга төдийгүй Японы Depp холбоонд амжилттай тулалдаж байсан манай шилдэг тулаанч Ц.Амарсанаа хамгийн сүүлд ONE Championship холбоонд АНУ-ын Хавай мужийн Бен Вилгемийг илүүрхэн ялсан юм. Ц.Амарсанаатай тулахаасаа өмнө ялагдал гээчийг үзээгүй байсан Бразилын жьюжицү суурьтай Бен Вилгем өмнөх өрсөлдөгчдөө бүгдийг нь өчиг, боолтоор ялаад байсан ч анхны ялагдлаа хүлээсэн билээ.
Тэгвэл Ц.Амарсанаа энэ сарын 29-ны өдөр Fierce fighting championship холбооны аварга "Харгис" хочтой Бен Эгли Солттой тулалдахаар боллоо. Тулаан АНУ-ын Солт Лэйк хотноо болох ба дэд оргил тулаанаар нэрлэгдэж байна. Өдгөө 33 настай Бен Эглигийн хувьд мэргэжлийн тулаанд 17 удаа орж 13 ялалт, дөрвөн ялагдалтай яваа бөгөөд хамгийн сүүлд өнгөрсөн оны есдүгээр сард Beatdown 22 тулааны оргил тулаанд орж өрсөлдөгчөө нэгдүгээр үед ялсан байна.
