Арабын нэгдсэн Эмират улсын Абу Дабы хотноо жүдо бөхийн энэ оны хамгийн сүүлийн их дуулга тэмцээн зохион байгуулагдаж байна. 

Яг одоо эрэгтэйчүүдийн -73, -81, эмэгтэйчүүдийн -63, -70 кг жингүүдийн барилдаан явагдах ба манай улсаас "Токио-2020" олимпын хүрэл медальт Ц.Цогтбаатар тэргүүтэй найман бөх барилдаж байна. Манай найман бөхийн оноолтын мэдээллийг ЭНД дарж үзнэ үү. 

Явцын мэдээлэл

Эрэгтэйчүүдийн -73кг жин:

А хэсэгт ДАШТ-ийн хүрэл медальт, МУГТ Г.Одбаяр эхний тойрогт энэ оны Парисын их дуулгын мөнгөн медальт Францын Р.Теог цэвэр ялсан ч хоёрдугаар тойрогт ОХУ-ын бөхөд ялагдан тэмцээнээ дуусгалаа. Тус жингийн С хэсгийг тэргүүлэн барилдаж буй олимпын хүрэл медальт Ц.Цогтбаатар эхний тойрогт гоц мөргөж хоёрдугаар тойрогт Бельгийн бөхийн цэвэр ялснаар хэсгийн аваргын төлөө Словенийн бөхтэй барилдахаар боллоо. 

Эрэгтэйчүүдийн -81 кг жин:

А хэсэгт Г.Болор-Очир эхний тойрогт Узбекистаны бөхийг цэвэр ялсан бол С хэсэгт Б.Батболд Германы бөхөд ялагдан тэмцээнээ дуусгалаа.  

Эмэгтэйчүүдийн -63 кг жин:

А хэсэгт С.Лхагвадулам эхний тойрогт гоц мөргөж улмаар хоёрдугаар тойрогт тус жинг тэргүүлэн барилдаж буй дэлхийн аваргын мөнгөн медальт Словенийн Л.Андрежад ялагдан тэмцээнээ дуусгалаа. Харин D хэсэгт Б.Баасанжаргал эхний тойрогт Финландын бөхийг торгуулиар цэвэр ялаад байна. 

Эмэгтэйчүүдийн -70 кг жин:

А хэсэгт М.Даваасүрэн Шведийн бөхөд ялагдсан бол D хэсэгт Ц.Энхчимэг Бразилын бөхийг хэдхэн хормын дотор цэвэр ялж хэсгийн аваргын төлөө дэлхийн аварга Францын Г.М.Ийвтэй барилдахаар боллоо. 

Тэмцээн Улаанбаатарын цагаар 16:00 цагт хэсгийн барилдаанаар эхлэх бөгөөд медалийн төлөөх барилдаануууд 21:00 цагаас явагдана.

Шууд дамжуулалтыг: Олон улсын жүдо бөхийн холбооны https://live.ijf.org/gs_uae2021/live_video сайтаар шууд хүлээн авч үзэх боломжтой.