Арабын нэгдсэн Эмират улсын Абу Дабы хотноо жүдо бөхийн энэ оны хамгийн сүүлийн их дуулга тэмцээн зохион байгуулагдана. 

Өнөөдөр албан ёсоор нээлтээ хийх тус тэмцээнд 41 орны 223 жүдоч хүч үзэх ба манай улсаас олимп, дэлхийн хүрэл медальт Ц.Цогтбаатар тэргүүтэй эрэгтэй 10, эмэгтэй 10 нийт 20 жүдоч хүч үзнэ. 

Тэмцээний эхний өдөр уламжлал ёсоор эрэгтэйчүүдийн -60, -66, эмэгтэйчүүдийн -48, -52, -57 кг жингүүдийн барилдаан явагдах ба манай улсаас найман жүдоч хүч үзнэ. 

Эрэгтэйчүүдийн -60 кг жин:

В хэсэгт ОУХМ Э.Сумъяабазар эхний тойрогт ОХУ-ын бөхтэй, С хэсэгт Б.Сүхбат энэ оны Парисын Их дуулгын мөнгөн медальт ОХУ-ын Рамазан Абдулаевтай барилдана.

Эрэгтэйчүүдийн -66кг жин:

-66 кг-ын жинг ДАШТ-ий хүрэл медальт ОУХМ Ё.Басхүү тэргүүлэн барилдах бөгөөд эхний тойрогт гоц мөргөж, улмаар хоёрдугаар тойрогт Кыргызстаны Байбол Саламат Уулутай учраа таарсан байна. С хэсэгт Г.Сод-Эрдэнэ эхний тойрогт Кыргызстаны К.А.Уулутай учраа таарсан байна.

Эмэгтэйчүүдийн -52 кг жин:

Энэ жинд манай улсаас хоёр бөх зодоглож байгаа ба В хэсэгт Б.Хорлоодой эхний тойрогт Европын аваргын мөнгө, хүрэл медальт Португалийн Жоана Диоготой, С хэсэгт Г.Ганцэцэг “Токио-2020” олимпын хүрэл медальт Их Британий Челси Жайлестай учраа таарсан байна.

Эмэгтэйчүүдийн -57 кг жин:

Энэ жинд мөн л хоёр бөх зодоглох ба А хэсэгт Л.Энхрийлэн Польшийн А.Подолактай, D хэсэгт Б.Алтанцэцэг Европын залуучуудын АШТ-ий хүрэл медальт Чехийн Вера Земановатай учраа таараад байна.

Тэмцээн өнөөдөр Улаанбаатарын цагаар 16:00 цагт эхлэх бөгөөд медалийн төлөөх барилдаануууд 21:00 цагаас явагдана.