Ирэх сарын 2-10-ны өдрүүдэд Норвеги улсын Осло хотноо бөхийн төрлүүдийн 17 дахь удаагийн ДАШТ зохион байгуулагдана. 

Эрэгтэй чөлөөт бөхийн ДАШТ 1951 оноос, эмэгтэй чөлөөт бөхийн ДАШТ 1987 оноос, сонгомол бөхийн ДАШТ 1904 оноос мөн 2003 оныг хүртэл тус тус бие даасан хэлбэрээр зохион байгуулагдаж байсан түүхтэй. Харин 2005 оноос бөхийн төрлүүдийн (эрэгтэй, эмэгтэй чөлөөт бөх, сонгомол бөх) ДАШТ хамтдаа зохион байгуулагдаж эхэлсэн түүхтэй ба энэ удаагийн ДАШТ нь 17 дахь удаагийн ДАШТ юм. Жил бүр зохион байгуулагдаж ирсэн тус тэмцээн өнгөрсөн жил ковид-19 цар тахлын улмаас анх удаа өнжиж энэ жил 10 дугаар сарын 2-10-ны хооронд зохион байгуулагдахаар боллоо. 

Энэ удаагийн ДАШТ-ий онцлогийг дурдвал олимпын 31 медальтан зодоглох урьдчилсан мэдүүлгээ өгөөд байгаагаас домогт А.Садулаев (ОХУ), Д.Тэйлор (АНУ), Т.Сток Менса (АНУ), М.Евлоев (ОХУ), М.Гераи (Иран), Л.Санчез Орта (Куба) нарын зургаа олимпын аварга багтаж байна.  

Монголын чөлөөт бөхийн холбоо "Осло-2021" насанд хүрэгчдийн ДАШТ-д оролцох баг тамирчдаа сонгон шалгаруулсан ба дараах тамирчид ДАШТ-д хүч үзэхээр боллоо. 

Эрэгтэйчүүд

• 57 кг: Эрдэнэбатын Бэхбаяр (Хүч, Хангарьд)
• 61 кг: Түмэнбилэгийн Түвшинтулга (МУБИС)
• 65 кг: Төмөр-Очирын Тулга (Хүч)
• 70 кг: Батчулууны Батмагнай (Алдар)
• 74 кг: Энхбаярын Бямбадорж (Алдар)
• 79 кг: Бямбасүрэнгийн Бат-Эрдэнэ (Хилчин)
• 86кг: Ганбаатарын Ганхуяг (МУБИС)
• 92 кг: Дагвадоржийн Оргилох (Хасу-Мегастарс)
• 97 кг: Өлзийсайханы Батзул (Аврагч, Хангарьд)
• 125 кг: Мөнхтөрийн Лхагвагэрэл (Хилчин)

Эмэгтэйчүүд

• 50 кг: Долгоржавын Отгонжаргал (Женко)
• 55 кг: Эрдэнэчимэгийн Сумъяа (Хилчин)
• 57 кг: Эрхэмбаярын Даваачимэг (Хилчин)
• 59 кг: Баатаржавын Шоовдор (Аврагч)
• 62 кг: Энхбатын Гантуяа (Хилчин)
• 65 кг: Түвшинжаргалын Энхжин (Алдар)
• 68 кг: Энхсайханы Дэлгэрмаа (Хасу-Мегастарс)
• 72 кг: Энх-Амарын Даваанасан (Алдар)
• 76 кг: Найгалсүрэнгийн Загардулам (Хилчин)

Эрэгтэй 10, эмэгтэй 10 буюу нийт 20 жингээс 19 нь дэлхийн аваргад оролцох эрхээ авсан бол эмэгтэйчүүдийн 53 кг жинд хяналтын барилдаанд түрүүлсэн "Алдар" спорт хорооны тамирчин Г.Отгонжаргал "Токио-2020" олимпын хүрэл медальт ОУХМ Б.Болортуяатай сорилт барилдаан хийж хэн ялсан нь Ослог зорихоор боллоо.