Маргааш (есдүгээр сарын 12-ны өдөр) эхлэх Японы мэргэжлийн сумо бөхийн Аки башёд их аварга Хакухо М.Даваажаргал ба түүний дэвжээнийхэн бүгд өнжихөөр боллоо.
Тодруулбал их аваргын тэргүүлдэг Мягино дэвжээнд коронавирусийн халдварын тохиолдол гарсан тул тус дэвжээнийхэн бүгд энэ удаагийн башёг өнжихөөр боллоо. Хэдийгээр их аварга өөрөө халдвар аваагүй ч хавьтагч гэдэг утгаараа башёг өнжихөөс өөр аргагүй болжээ. Иймд 73 дахь аварга Тэрүнофүжи Г.Ган-Эрдэнэ аваргын хувиар ганцаараа башёг тэргүүлэн барилдана.
Сумо бөх сонирхогчид их аварга Хакухо М.Даваажаргал, 73 дахь аварга Тэрүнофүжи Г.Ган-Эрдэнэ нарын өрсөлдөөнийг дахин харахыг тэсэн ядан хүлээж байсан ч харамсалтай нь энэ удаагийн башёд боломжгүй боллоо. Хоёр бөхийн хувьд өмнө нь 14 удаа учраа тааран барилдсан байдаг ба Хакухо аварга 10 удаа, Тэрүнофүжи дөрвөн удаа давж байсан түүхтэй.
