3х3 сагсанбөмбөгийн манай үндэсний шигшээ багууд өнөөдрөөс дөрвөн томоохон тэмцээнд оролцоно. 

Олимпын наадамд зодоглох эрхээ авсан эмэгтэйчүүдийн шигшээ баг маань "Токио-2020" олимпын наадамд оролцохоосоо өмнө хоёр тэмцээнд оролцох ба эхнийх нь өнөөдөр /тавдугаар сарын 15-ны өдөр/ эхлэх FIBA 3x3 Women's Series 2021 тэмцээн юм. Швейцар улсын Миес хотноо зохион байгуулагдах тус тэмцээнд Орос, Румын, Нидерланд, Монгол, Польш, Испани, Унгар, Швейцар гэсэн нийт найман баг өрсөлдөнө. Эдгээр багуудаас Монгол, Румын, ОХУ-ын багууд олимпын эрхээ хэдийнээ аваад байгаа бол үлдсэн багууд нь хараахан олимпын эрхээ аваагүй байгаа. Олон улсын сагсанбөмбөгийн холбооны /FIBA/ албан ёсны мэдээллийн сайтад дурдсанаар олимпын эрхээ авсан монголын шигшээ баг үндсэн бүрэлдэхүүнээсээ гадна U23 буюу 23 хүртэлх насны шигшээ багийн хамт Швейцар улсаад очоод байна. 

Монголын баг энэ удаагийн тэмцээнд ОХУ, Польш, Швейцар улсуудтай А хэсэгт багтсан ба өнөөдөр дараах хуваарийн дагуу тоглолтоо хийнэ. /Улаанбаатарын цагаар/

19:50 цагт Монгол - Польш
21:50 цагт Монгол - ОХУ
22:40 цагт Монгол - Швейцарь