Энэ жил анх удаа их дуулга ангиллаар зохион байгуулагдах гэж буй жүдо бөхийн Анталягийн их дуулга тэмцээнд таван тивийн 92 орны 437 тамирчин зодоглож байна.
Монгол улсын баг тамирчид оролцоогүй ч Япон улсаас олимпын наадамд зодоглох таван бөх оролцож тэмцээний эхний өдөр таамгийн дагуу эрэгтэйчүүдийн -66кг жинд дэлхийн хошой аварга Хифуми Абе аварга алтан медаль хүртлээ. Тэрээр хамгийн сүүлд жилийн өмнө Дюселдорфийн их дуулга тэмцээнд оролцон түрүүлж байлаа.
Эхний өдрийн дараах байдлаар Итали улсын баг, тамирчид нэг алт (өнгөрөгч долоо хоногт Тбилисийн их дуулга тэмцээнд МУГТ М.Уранцэцэг аваргад ялагдсан Милани Францеска), нэг мөнгөн медаль, хоёр шагналт байр эзэлсэн амжилтаар тэргүүллээ. Харин удаах байранд Канад орсон ба эмэгтэйчүүдийн -57кг жингийн финалд нутаг нэгт Дегучи Криста, Жессика Климкайт нар тунан барилдаж алт, мөнгөн медалиудыг хүртсэн байна. Хоёр бөхийн хувьд олон улсын дэвжээнээ зургаа дахь удаагаа учраа таарсан нь энэ бөгөөд Дегүчи Криста зургаа дахь удаагаа давж байна.
Өнөөдөр хуваарь ёсоор дунд жингийн барилдаануудаар тэмцээн үргэлжлэн явагдана.
