Жүдо бөхийн Ташкентын их дуулга тэмцээн хэдхэн цагийн дараа /12 цагт/ эхлэх гэж байна. 

Өнөөдөр тэмцээний эхний өдөр хуваарь ёсоор хөнгөн жингийн барилдаанууд явагдах ба манай улсаас дэлхийн аваргын иж бүрэн медальт МУГТ М.Уранцэцэг, олимпийн мөнгө, дэлхийн аварга МУГТ Д.Сумъяа тэргүүтэй есөн бөх барилдах оноолттой байна. Манай бөхчүүдийн өнөөдрийн оноолтыг танилцуулж байна. 

Эрэгтэйчүүдийн -60кг жин

Энэ жинд нийт 41 бөх барилдах ба манай улсаас хоёр барилдана. Тус жингийн А хэсэгт ОУХМ Л.Өнөболд, С хэсэгт ОУХМ Э.Ариунболд нар эхний тойрогт гоц мөргөсөн байна. 

Эрэгтэйчүүдийн -66кг жин

Энэ жинд нийт 39 бөх барилдах ба манай улсаас мөн хоёр барилдана. Тус жингийн С хэсгийг ОУХМ Г.Хэрлэн, D хэсгийг ОУХМ Ё.Басхүү нар тэргүүлэн барилдах тул хэн хэн нь эхний тойрогт гоц мөргөлөө. 

Эмэгтэйчүүдийн -48кг жин

Энэ жинг дэлхийн аваргын иж бүрэн медальт МУГТ М.Уранцэцэг аварга тэргүүлэн барилдах тул эхний тойрогт гоц мөргөсөн байна. 

Эмэгтэйчүүдийн -52кг жин

Энэ жинд манай улсаас хоёр бөх барилдах ба А хэсэгт ОУХМ Б.Хорлоодой эхний тойрогт Италийн бөхтэй барилдах бол С хэсэгт ОУХМ Л.Сосорбарам Португалийн бөхтэй барилдах оноолттой байна. 

Эмэгтэйчүүдийн -57кг жин

Энэ жинд манай улсаас мөн хоёр бөх барилдах ба В хэсэгт олимпийн мөнгө, дэлхийн аварга МУГТ Д.Сумъяа, С хэсэгт ОУХМ Л.Энхрийлэн нар эхний тойрогт гоц мөргөж хоёрдугаар тойрогт МУГТ Д.Сумъяа Узбекистаны бөхтэй барилдах бол Л.Энхрийлэн тус жингийн С хэсгийг тэргүүлэн барилдаж буй Израйлийн Т.Л.Нелсонтой барилдах оноолттой байна.