Мэргэжлийн снукер биллиардын 30 дахь удаагийн түүхт "Welsh Open 2021" тэмцээний хагас шигшээ тоглолт явагдлаа. 

Урьд шөнө явагдсан хагас шигшээ эхний тоглолтод Марк Селби аваргыг хожин шуугиан тарьж хагас шигшээд үлдсэн Ирландын Жордан Браун Велсийн цомын 2013 оны аварга Стефен Магуирыг 6:1 харьцаагаар хожин мөн л дуулианы эзэн боллоо. Өдгөө 33 настай Ирланд тоглогч анх удаа дэлхийн чансаа олгох тэмцээнд финалдаж буй нь энэ юм. 

Харин удаах тоглолтод дэлхийн зургаа, велсийн дөрвөн удаагийн аварга Ронни О Сулливан дэлхийн аварга бөгөөд велсийн хошой аварга Марк Виллиамстай 48 дахь удаагаа учраа тааран тоглолоо. Хэн хүнээс илүүтэйгээр Марк Виллиамс аварга энэ удаа Рей Рердений цомыг өргөхийг хүсэж буйгаа илэрхийлж байсан ч хагас шигшээд Ронни аваргын өмнө хүчин мөхөстөж 6:1 харьцаагаар хожигдон тэмцээнээ дуусгалаа. 

Тоглолтын эхний хожлыг Марк Виллиамс авсан ч зургаа дараалан хожигдон тэмцээнээ дуусгалаа.  

Манай сайт уламжлал ёсоор энэ сарын 15-21-ний өдрүүдэд "2021 Welsh Open" тэмцээнийг шууд дамжуулан үзүүлэхээс гадна тоглолт бүрийн тойм мэдээллийг тогтмол хүргэх болно.