Мэргэжлийн снукер биллиардын ДАШТ-ий онцлох тоглолтуудын бичлэгийг цувралаар толилуулж байна.
Урьд шөнө шөвгийн 8-ын тоглолтууд явагдаж дууслаа. Шөвгийн 8-ын тоглолтуудыг цувралаар тоймлон хүргэж байна.
Нэн түрүүнд онцлох тоглолт бол дэлхийн гурван удаагийн аварга Марк Селби, дэлхийн аварга Нейл Робертсон нарын тоглолт байлаа. Хоёр аваргын хувьд өмнө нь 33 удаа учраа тааран тоглоход нэг удаа тэнцэж Селби аварга 18 удаад нь хожоод байсан юм. Харин дэлхийн аваргын ширээнээ тэд хоёр дахь удаагаа таарч буй нь энэ юм. 2014 оны ДАШТ-ий хагас шигшээд таарахад мөн л Селби аварга хожиж байсан юм.
Энэ удаад Селби аварга тоглолтын эхнээс санаачлагыг гартаа авч 13:7 харьцаагаар ээлжит ялалтаа байгуулан ДАШТ-ний хагас шигшээд зургаа дахь удаагаа тунан үлдлээ.
Тоглолтын дараа Нейл Робертсон: "Марк Селбигийн гайхалтай аюулгүй цохилт, хамгаалалт нь түүнд ялалт өглөө. Тэр үнэхээр надад чөлөөтэй цохих боломж бараг өгсөнгүй" хэмээн хэлжээ.
Шөвгийн 4-т Марк Селби домогт Ронни О Сулливантай тулна.
