"2020 Betfred World Snooker Championship" мэргэжлийн снукер биллиардын дэлхийн аварга шалгаруулах тэмцээн өчигдөр албан ёсоор эхэллээ.
Үзэгчдийн өндөр хүлээлт дор эхэлсэн ДАШТ-ний эхний тоглолт шинэхэн дэлхийн аварга бөгөөд дэлхийн чансааг тэргүүлэгч Жадд Трампын тоглолтоор эхэлсэн. Тэрээр урьдчилсан шалгаруулалтаар гарч ирсэн нутаг нэгт Том Фордтой тоглосон ба тоглолтын эхэнд гурав дараалан хожигдлоо. Гэвч тоглолтын эцсийн дүнд 10-8 харьцаагаар өрсөлдөгчөө буулган авч дараагийн шатанд шалгарлаа.
Ж.Трамп тоглолтын дараа: "Тэмцээн бүрийн эхний тоглолтууд хэцүү байдаг. Өнөөдөр ч бас л хүндхэн эхэлсэн ч тоглолтоос тоглолтын хооронд алдаа гаргахгүйг хичээж хожил авч чадсандаа баяртай байна" хэмээн хэллээ.
Мөн түүнчлэн Жадд Трамп өчигдөр 100-аас дээш оноог хоёр удаа авсан ба (104, 131) энэ улиралд 100 дахь 100-аас дээш оноогоо авч буй нь энэ юм. Энэхүү үзүүлэлтээрээ нэг улиралд 100-аас дээш оноог 100 ба түүнээс дээш удаа авсан хоёр дахь тоглогч болж байна. 2013-2014 оны улиралд Нейл Робертсон 103 удаа 100-аас дээш оноо авч байлаа.
