Жүдо бөхийн Парисын их дуулга тэмцээний эхний өдөр хуваарь ёсоор эмэгтэйчүүдийн -48, -52, -57, -63 кг, эрэгтэйчүүдийн -60, -66, -73 кг жингүүдийн барилдаан явагдана.
Манай сайт өнөөдөр барилдах эмэгтэй жингүүдийн оноолт болон тэмцээний дэлгэрэнгүй хуваарийг мэдээлсэн билээ. ЭНД дарж үзнэ үү.
Тэгвэл одоо өнөөдөр барилдах эрэгтэй жингүүдэд манай бөхчүүд хэрхэн оноолттой байгааг дэлгэрэнгүй танилцацгаая.
Эрэгтэйчүүдийн -60 кг жинд манай хоёр бөх барилдана
Энэ жинд өнөөдөр 44 жүдоч барилдах ба дэлхийн аваргын мөнгөн медальт Д.Амартүвшин С хэсэгт, залуучуудын дэлхийн аваргын хүрэл медальт Л.Өнөболд В хэсэгт тус тус эхний тойрогтоо гоц мөргөсөн байна.
Эрэгтэйчүүдийн -66 кг жинд Г.Хэрлэн хэсгээ тэргүүлэн барилдана
Энэ жинд 69 бөх барилдах ба С хэсгийг Мастерсийн аварга Г.Хэрлэн тэргүүлж, В хэсэгт Ё.Басхүү тус тус эхний тойрогт гоц мөргөсөн байна.
Эрэгтэйчүүдийн -73 кг жинд хамгийн олон бөх барилдана
Энэ жинд Парисын их дуулга тэмцээний хамгийн олон бөх буюу 76 бөх барилдана. Манай улсаас дэлхийн аваргын хүрэл, Мастерсийн мөнгө, их дуулга тэмцээнүүдийн аварга Г.Одбаяр А хэсэгт, залуучуудын дэлхийн аваргын хошой мөнгөн медальт Ц.Цогтбаатар С хэсэгт тус тус эхний тойрогтоо гоц мөргөсөн байна.
