Олон улсын олимпийн хороо өчигдөр шуурхай хуралдаан зарласан ба дэлхий нийтэд тархаад буй корона вирусийн тархалтын улмаас Токио-2020 олимпийн наадмыг хойшлуулах боломжтой эсэх асуудлаар хэлэлцсэн байна. 

Ердөө хэдхэн хоногийн өмнө олимпийн бамбарыг Грекээс Япон улсад авч ирсэн ба зохион байгуулагчдын зүгээс олимпийн наадмыг саадгүй зохион байгуулах итгэл үнэмшилтэй байгаа ч хэд хэдэн улсын зүгээс олон улсын олимпийн хороонд энэ удаагийн "Токио-2020" наадмыг хойшлуулах хүсэлт ирүүлсээр байна. 

Өнгөрөгч долоо хоногийн мягмар гарагт /гуравдугаар сарын 17-ны өдөр/ олон улсын олимпийн хорооноос "Олимпийн наадам зохион байгуулагдахад дөрвөн сар хүрэхгүй хугацааны дотор ямар нэгэн эрс шийдвэр гаргах шаардлагагүй" хэмээн мэдэгдэж байсан ч коронавирусийн тархалт, олон улсаас ирж буй шаардлагын дагуу шуурхай хурал зарлахад хүргэсэн байна. 

Хуралдаанаас дөрвөн долоо хоногийн дотор зохион байгуулах хороо, Японы засгийн газартай зөвшилцөн эцсийн шийдвэрийг гаргах болно хэмээн мэдэгдсэн байна.