"Токио 2020" олимпийн их наадамтай жилийн жүдо бөхийн эхний их дуулга тэмцээн болох "Парисын их дуулга" тэмцээн зохион байгуулагдахад хэдхэн хоног үлдлээ.
Энэхүү их дуулга тэмцээн хэд хэдэн онцлогтой болох нь. Тодруулбал түүхэндээ хамгийн олон улсын олон тамирчид оролцохоор болоод байна.
- 2017 онд 61 орны 409 жүдоч оролцож байв
- 2018 онд 71 орны 403 жүдоч оролцож байв
- 2019 онд 97 орны 570 жүдоч оролцож байв
- Тэгвэл 2020 онд 121 орны 740 жүдоч оролцох мэдүүлгээ өгөөд байна.
Мөн түүнчлэн дэлхий нийтийг түгшүүлж буй Корона вирусын дэгдэлтийн улмаас БНХАУ-ын тамирчид оролцох боломжгүй боллоо. Учир нь Хятад дахь Францын элчин сайдын яам тодорхойгүй хугацаагаар үүдээ барьсан нь хятадын тамирчдад Францын виз авах боломжгүй байдал үүсээд байна. Энэхүү шалтгааны улмаас БНХАУ-ын жүдо бөхийн холбооноос тус тэмцээнд бүртгүүлсэн тамирчдаа эргүүлэн татлаа.
Энэ сарын 8-ны өдөр үүдээ нээх Парисын их дуулга тэмцээний өмнө манай сайт тус тэмцээнтэй холбоотой мэдээ, мэдээллийг цувралаар хүргэх болно.
