Өнөөдөр жүдо бөхийн дэлхийн чансааны оноо олгох эрэгтэйчүүдийн Европын нээлттэй Оберварт Опен тэмцээний хоёр дахь өдөр манай хоёр жүдоч хүч үзнэ.
Өчигдөр /хоёрдугаар сарын 15-ны өдөр/ жүдо бөхийн дэлхийн чансааны оноо олгох эмэгтэйчүүдийн Европын нээлттэй Братислав Опен зохион байгуулагдаж дууссан бол эрэгтэйчүүдийн Европын нээлттэй Оберварт Опен тэмцээний хөнгөн жингийн барилдаанууд явагдлаа.
Эмэгтэйчүүдийн Европын нээлттэй Братислав Опен тэмцээнд манай улсаас Г.Наранцэцэг, О.Мөнхцэцэг, Э.Гандиймаа нарын гурван бөх барилдсанаас жингээ тэргүүлэн барилдсан Г.Наранцэцэг урамтай сайхан барилдаж мөнгөн медаль хүртсэн юм. Манай сайт тус тэмцээнийг шууд дамжуулан үзүүлсэн ба хэсгийн барилдаануудыг ЭНД, медалийн төлөөх барилдааныг ЭНД дарж үзнэ үү.
Харин өнөөдөр эрэгтэйчүүдийн Европын нээлттэй Оберварт Опен тэмцээний хоёр дахь өдөр -81 кг, -90 кг, -100 кг, +100 кг жингүүдийн барилдаан явагдах ба манай улсаас Б.Тэмүүлэн, О.Цэцэнцэнгэл нар барилдана.
Манай бөхчүүд нэг хэсэгт цугтаа орсон ба мастерсын хүрэл медальт Б.Тэмүүлэн эхний тойрогт Румыны жүдоч К.Лукатай барилдах бол залуучуудын ази тивийн аварга О.Цэцэнцэнгэл Францын А.Гуэрмантай учраа таарсан байна. Хэрэв манай бөхчүүд эхний өрсөлдөгчдөө ялсан тохиолдолд хоёрдугаар тойрогт хоорондоо барилдах юм. Б.Тэмүүлэн энэ жил 31 настай бол О.Цэцэнцэнгэл 20 настай буюу тэд 11 насны зөрүүтэй.
