ОХУ-ын Улаан-Үд хотноо сонирхогчдын боксын эмэгтэйчүүдийн дэлхийн аварга шалгаруулах тэмцээн өчигдөр албан ёсоор нээлтээ хийж өнөөдөр эхний тулаанууд явагдана.
11 дэх удаагийн дэлхийн аварга шалгаруулах тэмцээнд 57 орны 224 ширэн бээлийтэн дэлхийн аварга хэмээх эрхэм хүндтэй алдрын төлөө тулалдахаар Улаан-Үд хотноо хуран цуглаад байна. Манай улсаас Г.Пүрэв-Очир, М.Буянжаргал нарын дасгалжуулагчдын удирдлага дор долоон тамирчин оролцохоос гадна олон улсын боксын холбооны шүүгч Г.Бадрах дэлхийн аваргыг дэнсэлнэ.
Манай баг бүрэлдэхүүн:
- 48кг жинд Б.Мөнгөнсаран
- 51кг жинд Л.Алтанцэцэг
- 54кг жинд Э.Мичидмаа
- 57кг жинд Т Болортуул
- 60кг жинд М.Намуун
- 69кг жинд Э.Эрдэнэтуяа
- 75кг жинд Б.Мягмаржаргал
Өнгөрсөн жил Энэтхэг улсын Дели хотноо зохион байгуулагдсан дэлхийн аварга шалгаруулах тэмцээний -54кг жинд Монгол улсаас анх удаа дэлхийн аваргын хүрэл медаль хүртсэн М.Нандинцэцэг энэ жил өнжиж байгаа юм байна. Түүний хүрэл медалийн төлөөх гайхалтай тулааныг эргэн сануулж байна.
Өнөөдөр манай хоёр боксчин рингэнд гарах ба -51кг жинд Л.Алтанцэцэг эхний тойрогт Италийн Ф.Камиллатай тулалдах бол -57кг жинд Т.Болортуул Австралийн Н.Бриттанитай тулалдана. Өнөөдрийн тулаан Улаанбаатарын цагаар 18:00 цагт эхэлнэ.
Манай сайт сонирхогчдын боксын эмэгтэйчүүдийн дэлхийн аварга шалгаруулах тэмцээнийг шууд дамжуулан үзүүлэхээр ажиллаж байгаа ба өчигдөр нээлтийн ёслолын ажиллагааг шууд дамжуулан үзүүлсэн билээ. Нээлтийн ажиллагааг үзэхийг хүсвэл энд дарна уу.
