Монгол Улсын Ерөнхийлөгч Х.Баттулгаас сэтгүүлч, Соёлын гавьяат зүтгэлтэн Г.Жамъянг шүүхэд өгөхөө илэрхийлсэн  ил захидал илгээсэн. Бид уг захидалтай холбогдуулан СГЗ Г.Жамъян гуайтай утсаар холбогдож, та "Зууны мэдээ" сонинд гаргасан нийтлэлээ нотлох уу хэмээн асуухад

Соёлын гавьяат зүтгэлтэн, сэтгүүлч Г.Жамъян

“Би Монгол Улсын Ерөнхийлөгч Х.Баттулга та ийм ийм хэрэг үйлдсэн. Тиймээс огцор гэдэг асуудлыг "Зууны мэдээ" сонинд нийтэлсэн юм. Өнөөдөр тэр нийтлэлийн дагуу надад хариу барьж байгаа юм байна. Намайг шүүхэд өгвөл өгөг. Хангалттай нотлох баримт надад байгаа. Би хуульчид, өмгөөлөгчидтэйгээ сая уулзлаа. Сайтуудад намайг дэмжсэн олон зуун хүний санал сэтгэгдэл байгаа боловч намайг буруутгасан зүйл тэрэнд дунд байхгүй байна гэж байна билээ. Намайг шүүхэд өгсөн даруйд нь би сэтгүүлч нартаа хандан хэвлэлийн бага хурал хийнэ. Би юун төлөө сэтгүүлч билээ. Бүх баримтуудыг хэвлэлийнхэндээ өгнө. Зам тээврийн яаманд ажиллаж байгаад хөнөөгдсөн Т.Гомбосүрэнгийн эхнэрийн надад өгсөн 10 гаруй хуудас ярилцлага, материал байна. Тэрэнд аймшигтай нотлох баримтууд байгаа. Энэ бүх баримтуудыг нь би зөрүүлж дэлгэх болно. Ерөнхийлөгч ардаа шүүхтэй, би харин хэвлэлтэй” гэв.

Энэ асуудлыг тодруулж хэлэхэд Соёлын гавьяат зүтгэлтэн, сэтгүүлч Г.Жамъян гуай “Зууны мэдээ” сонины 2019 оны зургадугаар сарын 19-ний дугаарт Ерөнхийлөгч Х.Баттулгаа, та хэдий болтол барьцаанд хүлэгдэх юм бэ? гарчигтай нийтлэлээ гаргасан. Уг нийтлэлдээ “...Ерөнхийлөгч Х.Баттулга та өөрийгөө болон хамсаатнаа, гадаадад эрэн сурвалжлагдаж байсан нөхдөө онц ноцтой гэмт үйлдлээс хэрэгсэхгүй болгосон хэдэн шүүгч, прокуроруудын барьцаанд орчихсон юм уу. Зам тээврийн яамны газрын даргаар ажиллаж байсан Т.Гомбосүрэн Тавантолгой-Гашуун сухайт чиглэлд олон тэрбум төгрөгөөр шороо овоолуулсан таны ажлыг шалгаж ирснийхээ дараа таны гарын хүн гэгддэг Х.Махбалын гарт хороогдсон. Энэ хүн амины хэрэг таныг Ерөнхийлөгчөөр ажиллаж байгаа цагт шүүхээр шийдэгдэхгүй гэх яриа байна” хэмээн хатуу үгийг дайсан юм.

Уг нийтлэлтэй холбогдуулан Монгол Улсын Ерөнхийлөгч Х.Баттулга сэтгүүлч, СГЗ Г.Жамъян гуайд илгээсэн захидалдаа та бичсэн зүйлээ нотол, нотлохгүй бол шүүхэд хандана хэмээн мэдэгдээд байгаа билээ.

---