Өнөөдөр буюу аравдугаар сарын 2-ны өдөр Энэтхэгийн тусгаар тогтнол, энх тайвны бэлгэ тэмдэг Махатма Ганди мэндэлж байжээ. Энэтхэг улсад Махатма Гандийн мэндэлсний 150 жилийн ойг тэмдэглэж эхэллээ. Ойн баярын хүрээнд сургуулийн 150 сурагч Гандийн өмсдөг байсан уламжлалт нөмрөг, нүдний шил, малгайг өмсөж таяг атгажээ. Ражкот хотын сурагчид ийнхүү Гандиг дуурайж хувцасласан бол Ченнай хотын сурагчид иогийн дасгал хийж ойн баярт оролцсон байна. Энэтхэгийн Соёлын яамнаас Гандийн 150 жилийн ойг 2018 ба 19 онуудад хоёр жил тэмдэглэнэ гэж мэдэгджээ. Ерөнхий сайд Нарендра Моди ойг угтаж улс орон даяар мэндчилгээ дэвшүүлэхээс гадна хөнгөн гэмт хэрэг үйлдсэн ялтнуудыг хугацаанаас нь өмнө суллахаар болсон байна.

1869 онд одоогийн Гужарат мужид мэндэлж байсан Махатма Ганди Энтхэгийн тусгаар тогтнол, эв эеийн төлөө тэмцэгч төдийгүй дэлхийн нийтийн амар амгалан, энх тайвны бэлгэ тэмдэг болон нэрээ мөнхөлжээ. Тэрээр 1948 оны нэгдүгээр сарын 30-ны өдөр буюу Энэтхэг улс Британийн колончлолоос гарч эрх чөлөөний замд орсноос хойш ердөө гуравхан сарын дараа бусдын гарт амиа алдсан юм. Гандийн намтар түүх, үзэл санаа, байр суурийг нэгтгэсэн 1,150 хуудастай намтар ном дөнгөж хэвлэгдээд байна. Мөн Үндэсний Ганди музейд түүний ишлэл, үг яриа, илтгэл, мөргөл залбирлыг багтаасан дуу, дүрс бичлэгийн цогц дэлгэцийг байршуулжээ.

Аравдугаар сарын 2-ныг агуу Гандийн төрсөн өдөр төдийгүй Олон улсын хүчирхийлэлгүй өдөр болгон дэлхий нийтээр тэмдэглэн өнгөрүүлдэг юм.

 

Эх сурвалж: www.aol.com, www.independent.co.uk

---