Улаанбаатар хотод нийтийн эзэмшлийн гудамж зам, талбайн авто замын хөдөлгөөний аюулгүй байдлыг хангах зорилгоор Нийслэлийн Засаг даргын 2018 оны А/1041 тоот захирамжаар БНХАУ-аас 4820 метр шар өнгөтэй хайсыг 772 сая төгрөгөөр худалдан авсан гэдгийг өнөөдөр Улаанбаатар хотын захирагчийн ажлын албаны мэргэжилтэн Г.Билгүүн албан ёсоор мэдэгдлээ.

Монгол Улсад төмөр хашаа, хайс хийдэг 200 гаруй компани тогтвортойгоор үйл ажиллагаа явуулж байгаа. Тэд техникийн хүчин чадал, хүний нөөц, бүтээгдэхүүн үйлдвэрлэл нь хаана ч гологдохооргүй болтлоо хөгжсөн. Гэтэл Улаанбаатар хотын Захирагчийн ажлын албанаас зохион байгуулсан гэх уг тендерт Өмнөговь аймгийн Даланзадгад суманд бүртгэлтэй “Даян байгаль” гэх ганцхан компани материалаа ирүүлсэн нь гайхаш төрүүлж байгаа юм.

Агваанцэрэнгийн Даяндорж гэдэг хүний өмч болох “Даян байгаль” компани хэдийгээр 2007 онд байгуулагдсан, барилгын материалын бөөний болон жижиглэнгийн худалдаа эрхлэх зөвшөөрөлтэй боловч гадаад худалдаа хийх эрхгүй аж.

Тус компани зам, гудамжийг тусгаарлах шар өнгөтэй хайсыг 2019 оны гуравдугаар сарын 28-ны өдөр 1 метр тутмыг нь 160165 төгрөг, 90 мөнгөний үнэтэйгээр оруулж ирээд Улаанбаатар хотын Захирагчийн ажлын албанд хүлээлгэн өгч байжээ. БНХАУ-аас оруулж ирсэн шар хайс гэвч бодит байдал ямар үнэтэй байдгийг хятадын худалдааны сайтуудаас харлаа.

Гаднах өнгө, хийц нь яг ижилхэн боловч төмрийн орц  чанараасаа шалтгаалаад шар хайс маань 46-219 юаны үнэтэй юм байна. Өөрөөр хэлбэл хамгийн хямд хийгээд хамгийн чанартай шар хайсны үнийг 2019 оны 3 дугаар сарын 28-ны өдрийн Монголбанкны ханшаар бодож үзэхэд 1 метр нь 17992-82139 төгрөгийн хооронд байгаа юм. Мэдээж хэрэг нэг бүтээгдэхүүнээс маш их хэмжээгээр авсан тохиолдолд хятадын компаниуд тухайн бүтээгдэхүүнийхээ үнийг 20-60 хувиар бууруулдгийг бид мэднэ.

Хамгийн өндөр үнэтэй хамгийн чанартай хашааг “Даян байгаль” компани оруулж ирлээ гэхэд тээвэр татвар ашгаа нэмээд нэмээд 1 метрийг 110 мянгаар л оруулж ирэхээр байгаа юм. Өөрөөр хэлбэл метр тутмаас 50000 төгрөг, нийтдээ 241 сая төгрөгийн цэвэр ашиг олохоор тооцоо гарч байна. Энэ төсөл хэний санаа байсан, хэн хэрхэн хийсэн талаарх Улаанбаатар хотын Захирагчийн ажлын албаны дарга Т.Гантөмөрийн яриаг хүргэе.

Улаанбаатар хотын Захирагчийн ажлын албаны дарга Т.Гантөмөр

“Иргэд замын хөдөлгөөний дүрэм зөрчиж буруу зөв тийшээ эргэдгээс бол хүний амь нас эрүүл мэнд хохирсон аваар осол байнга гардгийг та нар мэдэж байгаа. Хуучин хотын дарга С.Батболд бид хоёр Бээжин хотын Засаг даргын урилгаар айлчилсан. Бээжин хотын замын хөдөлгөөний аюулгүй байдал, иргэдийнхээ амь насыг хамгаалж байгаа хамгийн зөв гарц шийдэл нь замын хөдөлгөөний урсгал тусгаарласан явган хүний  орц гарцын хөдөлгөөнүүдийг хаасан хашлага байсан. Дэлхий нийтийн чиг хандлага ч ийм юм байна. Ийм төрлийн ийм хайс хашлагуудаар та нар хотын хэмжээнд үүсээд байгаа асуудлаа шийдвэрлэх нь зөв гэж БНХАУ-ын мэргэжлийн байгууллагууд нь зөвлөгөө өгсний дагуу  бид хашлага хайсны үйлдвэр дээр нь очиж судлаад  ямар ч гэсэн эхний ээлжид Улаанбаатар хотын гол гол аваар осол гардаг, дүрэм журам зөрчдөг, явган хүн машин нь холилдсон замбараагүй явдлыг зогсоохын тулд хайс хамгаалалтыг судал гэж үүрэг өгөөд мэргэжлийн байгууллагуудыг Бээжингийн үйлдвэрүүд рүү явуулсан. Засаг даргын захирамжаар 700 орчим сая төгрөгөөр нийтдээ 4850 ширхэг хашлагыг Бээжин хотын үйлдвэрээс авчирсан” гэсэн юм.

Т.Гантөмөр даргын ярианаас үзвэл энэ хашаа хаалтыг Монголынхоо компаниудаар хийлгэх зорилго анхнаасаа огт байгаагүй болох нь харагддаг. Түүгээр ч зогсохгүй аль үйлдвэрээс ямар хашлагыг авахаа судлаад ир хэмээн хотын захиргаанаасаа  БНХАУ руу хүмүүс томилж явуулсан байгаа юм.

Нийслэлийн Засаг дарга бөгөөд Улаанбаатар хотын захирагч асан Сундуйн Батболд, түүний захирагчийн ажлын албаны дарга Т.Гантөмөр нарын захиалгатай, асар өндөр дүнтэй худалдан авалтын тендерт Улаанбаатар хотод үйл ажиллагаа явуулдаг 200 гаруй төмөр бэлдэцийн үйлдвэр яагаад оролцоогүй нь маш тодорхой.  Энэ асуудлыг АТГ шалгах ч ёстой.

Нийслэлийн засаг даргын албан ёсны ulaanbaatar.mn цахим хуудаст Нийслэлийн Засаг даргын бүх захирамж нийтлэгддэг. Гэхдээ Засаг даргын 2018 оны 11 дүгээр сарын 12-ны өдрийн А/1040,  Засаг даргын 2018 оны 11 дүгээр сарын 13-ны өдрийн А/1042 дугаар захирамж нь ulaanbaatar.mn цахим хуудаст байх атлаа бидний хайгаад А/1041 дугаартай захирамж нийтлэгдээгүй байгаа юм. Хэн, яах гэж энэ захирамжийг нуусан бэ гэдэг нь анхаарал татаж байна.

 

---