Баянзүрх дүүргийн 16 дугаар хороо, Улаанхуарангийн эцэст байрлах “Өнөр бүл” төвийн байрны хоёрдугаар давхарт өнгөрсөн бямба гарагт гал гарч, хүүхэд угаартсан харамсалтай хэрэг гарсан.

Бүтэн өнчин, олдмол, хаягдмал, эцэг эхийн хайр халамжаас гадуур эрсдэлтэй нөхцөл байдалд байгаа хүүхдүүдийг өсгөн хүмүүжүүлдэг  “Өнөр бүл” төвийн үйл ажиллагаа хэрхэн үргэлжилж байгаа, угаартсан  хүүхдүүдийн биеийн байдал ямар байгааг Гэр бүл, хүүхэд, залуучуудын хөгжлийн газрын дэд дарга Б.Халиунаас тодруулахад

“Манай байгууллагын харьяа Хүүхэд, гэр бүл,  хөгжлийн “Өнөр бүл” төвийн байранд энэ зургадугаар сарын 17-ноос эхлэн цахилгаан, сантехникийн урсгал засвар хийхээр төлөвлөж, төсөв мөнгийг нь шийдчихсэн байсан.

Гэтэл засвар хийхээс хэдхэн өдрийн өмнө ийм харамсалтай хэрэг гарлаа. Гал түймрийн үеэр угаартсан нэг хүүхдийн биеийн байдал хэвийн болсон.

“Өнөр бүл” төв дээр Хөдөлмөр, нийгмийн хамгааллын дэд С.Мөнгөнчимэгээр ахлуулсан ажлын хэсэг томилогдон ажиллаж байгаа. Тус төв маань бага насны болон өсвөр насны хүүхдүүдийн хичээлийн хоёр байртай. Одоогоор бүх хүүхдүүдийг цэцэрлэгийн байранд байрлуулчихсан, хичээл сургалтын үйл ажиллагааг хэвийн явуулж байна.

Хүүхдүүдийн маань хичээл зургадугаар сарын 17-ны өдөр дуусч, амрангуут бүгдийг нь зусланд гаргаад наймдугаар сарын 15-наас өмнө бүх засвар үйлчилгээг дуусгасан байхаар төлөвлөн ажиллаж байна” гэв.

Монгол Улсад цор ганц байдаг “Өнөр бүл” төвийн хоёрдугаар давхар шатсантай холбоотойгоор хүүхдүүд хувцас хэрэглэл, нөмөрч унтах хөнжлөөс эхлээд олон зүйлийн гачигдалтай байгаа гэдгийг тус төв дээр ажилласан сэтгүүлчид бичиж байна. Иймд эцэг эхийн хайр халамжаас мэдэрч чадаагүй тэдгээр хүүхдүүдэд туслахыг хүссэн хүн бүхэн “Өнөр бүл” төвийг зориорой.

---