Монгол Улсаас БНТУ-ын Истанбул дахь Ерөнхий консулын газарт ажилладаг 1 дипломат ажилтан, 1 жолооч нар өнгөрсөн тавдугаар сарын 3-ны өдөр Монгол Улсын Дипломат төлөөлөгчийн газрын дипломат дугаартай, 2014 оны Мерседес Бенц И класс маркийн суудлын автомашинаар 70 кг геройны төрлийн мансууруулах бодисыг тээвэрлэж яваад ХБНГУ-ын Дрезден хотын гааль, цагдаагийнханд саатуулагдсан ноцтой хэрэг гарлаа.

Монгол Улсын нэр хүндийг олон улсад сэвтүүлсэн энэ хэргийн эзэн холбогдогч хэн болохыг ГХЯ-ны Консулын хэлтсийн дарга Н.Мөнхтүшигээс тодруулахад

“Ар гэрийнхэн нь хүсэлт гаргасан учраас хувь хүний нууцтай холбоотой мэдээллийг өгөх боломжгүй. Харин тэдгээр хүмүүс БНТУ-ын Истанбул дахь Ерөнхий консулын газарт ажилладаг 1 дипломат ажилтан, 1 жолооч нар гэдэг мэдээлэл үнэн” гэсэн юм.

Дрезден хотын гаалийн албаны хэвлэлийн төлөөлөгч Франк Шроцер хийсэн мэдэгдэлдээ

“ХБНГУ-ын Дрезден хотын гаалийн байцаагчид 5 дугаар сарын 03-ны өглөө эрт Бут готтлеба хотын ойролцоох 17А хурдны замаар явж байсан дипломат дугаартай автомашиныг зогсоож шалгах гэхэд тэдгээр хүмүүс дипломат пасспортаа үзүүлж шалгуулахаас татгалзсан.

Уг дипломат пасспорт нь Турк улсад хүчинтэй боловч,  Герман улсад хүчингүй тул уг машиныг шалгахад 140 ширхэг, тус бүр нь 500 грамм геройны төрлийн мансууруулах бодис илэрсэн.

Монгол Улсын дипломат ажилтнуудаас их хэмжээний геройн илэрсэнтэй холбоотойгоор Берлин дэх Монгол Улсын дипломат төлөөлөгчийн газарт нэгжлэг хийсэн. Уг геройны төрлийн мансууруулах бодисыг гудамжинд борлуулахад дор хаяж 3 сая евро хүрнэ. Монголын дипломат төлөөлөгчдийг тэр даруй саатуулсан бөгөөд маргааш өдөр нь Дрезден хотын шүүхээс үргэлжлүүлэн хорих шийдвэр гаргасан” гэжээ.

Уг хэргийг үйлдсэн хүмүүс нь Истанбул дахь Ерөнхий консулын газрын дэд консул Бат-Эрдэнийн Баттүшиг, жолооч Э нар байсныг албаны эх сурвалж мэдээлсэн.

Бат-Эрдэнийн Баттүшиг нь БНТУ-ын Истанбул дахь Ерөнхий консулын газарт Дэд консулын албан тушаалд 2018 оны 7 дугаар сарын 1-ний өдөр томилогдож байжээ.

Харин түүний аав нь НАХЯ-ны тагнуулч, Шүүхийн Ерөнхий Зөвлөлийн гишүүн, УДШ-ийн шүүгчээр ажиллаж байгаад 2016 онд тэтгэвэртээ гарсан Батбуянгийн Бат-Эрдэнэ шүүгч юм байна.

Foto: Zollfahndungsamt Dresden

---