Ардчилсан намаас зохион байгуулж буй эсэргүүцлийн жагсаалыг Сүхбаатарын талбайгаас шууд дамжуулан хүргэлээ

Ардчилсан намаас “Эрх баригчдаас хариуцлага нэхэх жагсаал”-ыг өнөөдөр Сүхбаатарын талбайд зохион байгууллаа. Уг жагсаалд Ардчилсан намын 9 дүүрэг дэх намын хороодын төлөөлөл, оюутан, залуучууд, ахмадууд, бүр ЕБС-ийн сурагч гэх мэт 1000 орчим хүн ирж оролцлоо.

Төрийн ордныг гороолон алхаж буй оюутнуудын төлөөллөөс ямар шалтгааны улмаас тус жагсаалд нэгдсэнийг асуухад “Оюутнуудын 70 мянган төгрөгийг нөхөн олгуулах, оюутнуудын тэтгэмжийг нөхөн олгуулах асуудлыг шаардаж байна. Оюутнуудын сургалтын төлбөрийн нэмэгдлийг бууруулах, автобусаар хөнгөлөлттэй үнээр зорчих тоог нэмэгдүүлэхийг шаардан жагсаж байна” гэсэн болон залуучуудыг төлөөлж ирсэн эмэгтэй “Надад их дээд сургуульд сурдаг олон дүү байдаг. Өглөө босоход хэнийх нь автобусны төлбөрийг төлөх вэ гэдгээс эхлээд асуудал үүсдэг. Дүү нарыгаа ажилчин анги болгочихгүй юмсан гээд боловсролтой болгочихъё гэхээр төлбөр нь тасралтгүй өсөж байна. Гэх мэт олон асуудал байгаа учраас энэ жагсаалыг ирж дэмжсэн” гэдгээ хэлсэн юм.

АН-ын Баянгол дүүргийн 6-р үүрийг төлөөлж ирсэн залуу “Монголд шударга ёс байхгүй боллоо. Төр засаг маань эргэж комунизм, социализм байгуулах гэж байгаад санаа зовоод энэ жагсаалд нэгдлээ. УИХ-д сууж байгаа гишүүд дэндүү хариуцлагагүй байна. Муу бүхэн тэндээс сонсогдож байна. Хариуцлага алдаж байгаа бүх хүнийг огцруулж байж бид шударга нийгмийг байгуулна” хэмээн санал бодлоо илэрхийлэв.

Сонгинохайрхан дүүргийн АН-ын үүрийн эмэгтэй “Урьд хожид байгаагүйгээр юмны үнэ өсч байна. Хүмүүсийн амьдрал хэцүү байна. Үр ач нарынхаа ирээдүйн төлөө жагсаж байгаадаа баяртай байна. УИХ тарах ёстой. Болдог бол өнөөдөр тараамаар байна” гэлээ.

АН-ын гишүүн, Гэр хорооллын хөдөлгөөний зохицуулагч Э.Бат-Үүл “Ардчилсан хувьсгал ялснаас хойш өнөөдрийг хүртэлх хугацаанд ард түмнийгээ ийм ичгүүр сонжуургүйгээр элэг барьдаг Ерөнхий сайдыг би үзээгүй. Чөлөөт зах зээлд шилжсэнээс хойш маханд очерлохыг сая харлаа. Ийм зүйл харна гэж ерөөсөө санасангүй. Иргэдийн чөлөөт сонгуулийг эрх баригч нам зогсоохыг харна гэж бодоогүй. Ийм зүйлийг бид харлаа” хэмээн индэр дээрээс мэдэгдлээ.

 

---