Монгол Улсын Ерөнхийлөгч Х.Баттулга УИХ-ын чуулганаар хэлэлцэгдэж батлагдсан Татварын багц хуульд бүхэлд нь хориг тавьсан билээ.  Гэвч уг хуулийг санаачлагч Сангийн яам болон МАН-ын бүлэг уг хоригийг "хүчингүй болсон хуулийн заалтад хориг тавьсан, ямар ч үндэслэлгүй" гэж үзээд ХОРИГИЙГ ХҮЛЭЭЖ АВАХГҮЙ гэдгээ мэдэгдсэн юм. Мөн Ерөнхийлөгчийн тамгын газрынхан/ЕТГ/ “хуулиа уншиж судлаагүй байна” хэмээн мэдэгдээд байгаа юм.

Харин Ерөнхийлөгчийн тамгын газрынхан Татварын багц хуулинд хүний эрх зөрчсөн олон зүйл заалт байгааг дурдаад "хууль санаачлагчид өөрсдөө хуулиа уншиж судлаагүй байна" хэмээн онцлоод, дахин нэмэлт тайлбар, мэдэгдэл өгөөд байгаа билээ. Мэд тэд хүчингүй болсон хуулинд хориг тавиагүй гэдгээ ч дурдаад байгаа юм.

Тиймээс бид “СӨРӨГ ТАЙЛБАР”-таа хууль санаачлагч Сангийн сайд Ч.Хүрэлбаатар болон хуулинд хориг тавьсан Ерөнхийлөгчийн зөвлөх Ц.Эрдэнэбат нарын сөрөг тайлбарыг онцлон хүргэж байна.  

Сангийн сайд Ч.Хүрэлбаатар: Хуулиа уншаагүй, хүчингүй хуулинд хориг тавьсан

- Өрийн удирдлагын тухай хууль Засгийн газрын өрийг зохицуулсан хууль шүү дээ. Хувь хүн болон хувийн хэвшлийн (Оюутолгой, Рио Тинто гм) авсан өр үүнд хамаагүй. Төсвөөс иргэнд төлөх өрийг зохицуулдаг хуулийг Өрийн удирдлагын тухай хууль гэдэг. Гэтэл энд заасан хуулийн заалт хамаарна гэсэн зүйл байна лээ. Одоо мөрдөгдөж байгаа 10 хувийг андуураад, 1 хувиар буулгаад буулгасан байна лээ. Рио Тинтотой холбоотой зүйл бичсэн байна лээ. Энэ компани Монголд бүртгэлтэй компани биш шүү дээ. Гэтэл энэ хууль чинь Монгол улсад бүртгэлтэй компаниудыг зохицуулсан хууль. Үнэхээр хуулиа ойлгохгүй бол Сангийн яаман дээр ирээд, асуухад манайх нээлттэй.  Надтай холбоотой дөрөв дэх хоригийг тавьсан гэж бичсэн байна лээ. Тэр үнэн шд. 

Эдийн засгийн өсөлтийг хангасан, бизнэс эрхлэгчид болон ард иргэдээ дэмжсэн, олон улсын жишигт нийцсэн, үндэстэн дамжсан корпорациуд татвараас зугтах боломжийг хаасан татварын багц хуулийг УИХ ээлжит бус чуулганаар баталсан юм. Тавьсан хоригийг боловсруулж бэлдсэн хүмүүс нь хуулийг ойлгоогүй, эсвэл уншаагүй туйлын хариуцлагагүй ажиллажээ. Тэр ч бүү хэл 2006 онд хүчингүй болсон, байхгүй хуулинд ч хориг тавьсан.

Ерөнхийлөгчийн зөвлөх Ц.Эрдэнэбат: Бид хүчинтэй хуулинд хориг тавьсан

- Татварын багц хуулин дээр маш олон иргэд, ААН-үүдээс санал, гомдол ирсэн. Тухайлбал, МҮХАҮТ-аас ялгаварлан гадуурхсан, өмчийн эрхэд халдсан заалт байгааг дурдсан. Мөн татвар төлөгчдөөс Татварын хуулин дээр хүний эрх зөрчсөн маш олон зүйл, заалт байна гэдгийг онцолсон. Мөн энэ хуулиар дамжуулаад ядуурлыг хэдэн хувиар бууруулах юм, эдийн засагт ямар үр өгөөжтэй байх зэрэг нь маш тодорхойгүй.  Түүнчлэн 20 саяас дээш хөрөнгөтэй гадны хөрөнгө оруулагч хилээр гарах боломжгүй болж байна. Энэ нь гадны хөрөнгө оруулагчийг үргээх заалт бослон.

Энэ хуулийг санаачилсан яамныхан өөрсдөө харин хуулиа ойлгосон эсэхэд би эргэлзэж байна. Өөрсдийнх нь тавьсан тайлбарууд ойлгомжгүй, эргэлзээтэй учир EТГ-аас дахиад нэмэлт тайлбар өгсөн.

Мөн эдийн засгаа сайжруулахын тулд нэмж зээл авах бус санхүүжилт, хөрөнгө оруулалт татах ёстой. Гэтэл энэ хуулинд зээл авахыг илүү дэмжсэн агуулга орсон байна. Бид хүчинтэй хуулинд хориг тавьсан. Хуулийн нэрийг 2-3 газарт буруу бичсэн. Түүнийг тайлбарлаж хэлсэн...

 

 

---