УИХ-ын чуулганы 2017.05.17-ны өдрийн хуралдаанаар Эрүүгийн хэргийг хянан шийдвэрлэх тухай хуулийн шинэчилсэн найруулга эцсийн хэлэлцүүлгийг хийж, баталсан. Эрүүгийн хэргийн хөөн хэлэлцэх хугацааг богиносгох тухай саналыг Хууль зүйн байнгын хороон дээр УИХ-ын гишүүн, одоогийн Хууль зүйн байнгын хорооны дарга Ш.Раднаасэд санаачлан дэмжүүлж, УИХ-ын чуулган дээр УИХ-ын гишүүн Х.Нямбаатар нар дэмжиж батлуулж байжээ.

Гэтэл энэ хуулийн зүйл заалтаар жилийн өмнө тэрбум гаруй төгрөгийн авлига авсан нь үйлдэл дээрээ баригдсан МХЕГ-ын газар, хэлтсийн дарга нарын (өөр олон хэрэг бий.Сур) хэрэг "хөөн хэлэлцэх хугацаа дууссан" гэсэн үндэслэлээр хэрэгсэхгүй болсон. Үүнтэй холбогдуулж, Хууль зүйн байнгын хорооны дарга Ш.Раднаасэдийг нэг ангийн хүүхэд болох МХЕГ-ын Экспорт, импорт, хилийн хорио цээрийн хяналтын газрын дарга Э.Аззаяаг хэргээс мултлахын тулд Эрүүгийн хуульд өөрчлөлт оруулж, авлигачдад боломж олгосон гэж түүнийг буруутгасан юм. Үүнтэй холбогдуулан тэрээр өнөөдөр Төрийн ордонд тайлбар хийлээ.  

-Хуучин төслөөр гэмт хэрэг хөөн хэлэлцэх хугацааг яллагдагчаар татах хугацаагаар хүртэл тоолно. Яллагдагчаар татсанаар гэмт хэрэгт хөөн хэлэлцэх хугацааг зогсооно гэж заасан байсан. Санал гарч, өөрчилсөн байдал нь гэмт хэргийн хөөн хэлэлцэх хугацааг гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болоход зогсоно гэж заасан. Яагаад ингэсэн бэ гэхээр, хүнийг гэмт хэрэгт удаан хугацаагаар шалгадаг. Хэдийгээр 24 сарын хугацаатай боловч Прокурорын шийдвэрээр хугацаагүй хорьж шалгах хуулийн заалттай байсан. 

Эрүүгийн хуулинд 2008 онд өөрчлөлт ороход 10 000 хэрэг түдгэлзэж байсан туршлага бий. Хэргийг богино хугацаанд шалгах шаардлагатай. Хугацаанд нь шалгах хэрэгтэй. Иймд энэ хуулийн өөрчлөлтийг С.Зориг агсны амь насыг хөнөөсөн хэрэгтэй холбох ямар ч хэрэггүй. Хүн амины онц ноцтой хэрэгт хөөн хэлэлцэх хугацаа тооцохгүй гэсэн заалттай. 

Хөөн хэлэлцэх хугацаатай холбоотой, үүнийг шууд надтай холбон тайлбарлах явдал сүүлийн хэдэн өдөрт боллоо. Манай намаас ч энэ ажлыг зохион байгуулалттай хийж байна. Дэд сайд байсан Б.Энхбаяр хууль зүйн мэдлэгтэй хүн бэ. Буруу тайлбар хийгээд байна. 

МХЕГ-ын газар, хэлтсийн даргатай холбоотой хэрэгсэхгүй болгосон хэргийг надтай холбосон байна лээ. Э.Аззаяа надтай нэг төгсөлтийнх. Дэд сайд асан Б.Энхбаяр ч надтай нэг төгсөлтийнх. Тэр жил төгссөн 130 төгсөгчийг бүгдийг нь надтай хамаатуулбал утгагүй юм болно. МХЕГ-ын 2000 байцаагчийг надтай холбовол бас утгагүй.  

---