Засгийн газрын өнөөдрийн хуралдаанаар Байгалийн түүхийн музейг Их тэнгэрийн аманд барих шийдвэр гаргажээ.  Энэ асуудлын хүрээнд газар ашиглуулах гэрээ байгуулан хамтарч ажиллахыг холбогдох хүмүүст даалгасан байна. 

Байгалийн түүхийн музей нь 1924 онд Үндэсний музей нэртэйгээр байгуулагдсан. Музейн барилга нь 1955 онд Хөдөө аж ахуйн техникумын зориулалттай анх баригджээ. Барилгын ашиглалтын хугацаа нь бүрэн дуусч, 2013 оны тавдугаар сараас хойш  музейн олон нийтэд үйлчлэх үндсэн үйл ажиллагаг бүрэн зогсоогоод байгаа юм.  

Түүнээс хойш Байгалийн түүхийн музейн шинэ барилгыг 2017-2018 онд ашиглалтад оруулна гэж байсан ч баригдахгүй байсаар өнөөдрийг хүрсэн юм. Анх музейн шинэ барилгыг одоо байгаа энэ суурин дээр нь долоон давхар, 16 мянган шоометр хэмжээтэй барихаар төлөвлөж тооцоо гаргаж байсан юм. Харин Их тэнгэрийн аманд барихаар болон музей ямар хэмжээтэй, ямар стандарттай байхыг тун удахгүй танилцуулах болов уу. 

 

---