Хуульзүйн байнгын хорооны өнөөдрийн хуралдаанаар Авлигатай тэмцэх газрын даргыг чөлөөлөх, шинээр томилохоор МУ-ын ерөнхийлөгчөөс санал оруулсан нэр дэвшигчдийг томилох эсэхийг хэлэлцсэн юм. Хуульзүйн байнгын хорооны хуралдаан дээр АТГ-ын даргын ажлаасаа чөлөөлөгдөж буй Х.Энхжаргал хэд хэдэн анхаарал татсан мэдээллийг байнгын хорооны гишүүдэд өгсөн билээ. 

Х.Энхжаргал:

- Намайг томилогдож ажилласнаас хойшхи 2 жил 10 сарын хугацаанд болж өнгөрсөн бүх зүйлийг албан ёны хүмүүс албан ёсоор ойлгоод, олон нийтээс мэдээлэл авсан хүмүүс нь тэр мэдээллийнхээ хүрээнд ойлголттой байсан болов уу гэж бодож байна. 

Авлигын индекс 103 руу орсон энэ жил арай дээрдэж 93 болсон. Хамгийн их саад болсон зүйл нь  бонд босгож гаднаас зээл аваад, түүнийгээ замбараагүй үрчихээд 2015 онд өршөөлийн хууль гаргаж 33 их наяд төгрөгийн хэргийг өршөөчихсөн явдал. Энэ нь олон улсад очоод Монгол улсын нэрийг пад хар болгосон.

Би ажлилах хугацаандаа анхаарал татсан ихэнх хэргүүдийг шалгаад багагүй үр дүнд хүрсэн. 10-аад хоногийн өмнө Үндэсний аюулгүй байдлын зөвлөлийн тэргүүн болон УИХ-ын дарга, Оюутолгойг шалгах ажлын хэсгийн ахлагч, Эдийн засгийн байнгын хороон дарга нарт Оюутолгойтой холбоотой товхимлыг өгсөн. Маш ноцттой асуудлууд энд бий. Энэ бол хамгийн том хэрэг.

Оюутолгойг шалгах явцад үндэстэн дамнасан корпораци, эдийн засгийн бүлэглэл, хөрөнгө мөнгөтэй олон хүмүүстэй янз бүрийн аргаар нүүр тулсан. Бид харьцангуй сайн шалгасан гэдэгтээ итгэлтэй байгаа. Харин шинээр томилогдож байгаа удирдлагууд цаашид үргэлжлүүлэн сайн шалгаасай гэж хүсч байна.  Энэ хэрэг дээр гүйцэтгэх ажил, хэрэг бүртгэл, мөрдөн байцаалт явуулж болохгүй хаалттайгаар Татварын ерөнхий газар дээр нууцлалтай байна. Монгол Улсын ерөнхий прокурорын зөвшөөрлсний дагуу зарим нэг тоотой нь Авлигатай тэмцэх газар танилцсан. Энэ олон улсын байгууллагуудын дургуйг маш ихээр хүргэсэн.

Бусад анхаарал татсан хэргүүдийн өнөөдөр ерөнхий прокурорт өгнө. Энд гуран боть, 69 хэргийн тухай материал өгнө. Түүн дээр байдал илүү тодорхой харагдах байх. УИХ дээр эрүүгийн хэргүүдийн тухай ярих нь зохистой бус.

 

---