БНХАУ-ыг манай иргэд мэддэг мөртлөө мэддэггүй. Тус улсаар аялалахад юуг голчлон анхаарлаа хандуулах хэрэгтэй талаар Ханз боловсролын төвийн захирал, багш Б.Отгонжаргалыг Аяллын тойрог буландаа урин ярилцсан юм.

Хятад улсын хувьд өмнөд, дунд хойд хэсэг асар том газар нутагтай. Бид нарын мэддэггүй аялах хэрэгтэй маш олон газрууд байдаг тул очих газраа маш сайн судлах хэрэгтэй. Хятадууд тэр болгон англи хэл мэддэггүй. “Хятадаар яасан хөөрхөн хүүхэд вэ” хэмээн өхөөрдөн хэлэхэд эцэг, эхчүүд нь маш их дургүйцэн хүлээн авсан. Иймд бага насны хүүхдийг өхөөрдөж болохгүй. Учир нь тухайн гэр бүлийн хувьд ганцхан хүүхэдтэй байдаг тул хүний наймаа зэрэг олон зүйл цаанаа боддог юм шиг санагдсан. Манай улсад хүний хөлөн дээр гишгэх юм бол гар барьдаг. Хятад гэлтгүй бусад улс оронд ийм заншил байхгүй байх, иймээс зүгээр уучил гуйхад болно.

БНХАУ-ын хойд, өмнөд хэсгээр аялах тусам Монгол Улс гэдгийг мэдэхгүй хүмүүс их байдаг. Тэр хүмүүсийн хувьд манай улс зүгээр нэг гаднын орон шиг санагддаг тул манай улсыг үзэн ядах сэтгэгдэл байдаггүй.

Тус улсын хувьд гаднын жуулчдад зориулсан сүлжээ буудал, онлайн аппликэйшин аяллын компаниар дамжуулан урьдчилан захиалга хийснээр хамгийн хямд зочид буудалд байрлах, онгоцны тийз захиалах, үзэх газрынхаа орох тасалбар, аяллын компанийн хөтөлбөрт хамрагдах боломжтой. Энэ бүгдийг нь бол wechat-аар дамжуулан хийж байна гэж ойлгож болно. Манай төвөөр дамжуулан хүүхэдтэйгээ хамт хятад улс руу зорчсон нэг эрхэм дур мэдэн жуулчдад байрлах ёстой стандартын буудалд байрлаагүйгээс цагдаад баригдсан тохиолдол гарсан. Ер нь бол ихэнх хятадууд манай иргэдийг гадаад хүн гэж хүлээж авдаг болохоос биш монгол хүн хэмээн хүлээн авдаггүй.

Манай ханз боловсролын төвийн хувьд иргэдэд хэрэглээний хятад хэлийг монгол хүний сэтгэхүйд тохируулан зааж байна. Манай төвд хамгийн сүүлд 65 настай хүн хятад хэл сурсан. Хөрш орныхоо хэл соёлыг сурчих юм бол таны амьдрал илүү хялбар болохоос гадна олон боломж нээгдэнэ хэмээн захиж хэлмээр байна.

 

---