Эдийн засгийн байнгын хорооны өчигдрийн хуралдаанаар цахим орчинд бүртгүүлэхдээ нэр ус, утасны дугаараа бүртгүүлэхээс гадна регистрийн дугаар заавал тавьж байх талаар санал санаачилгыг зарим гишүүд, албаны холбогдох хүмүүс гаргасан нь шуугиан тариад байгаа. Энэ талаар манай сэтгүүлч асууж тодрууллаа.  

УИХ-ын гишүүн Я.Содбаатар: Цахим орчинд нэр, нүүртэй орох нь зүйтэй гэдэг дээр нэгдэж байгаа

-Эдийн засгийн байнгын хороонд Харилцаа холбооны багц хууль орж ирсэн. Цахим орчинг зөв болгоё гэж олон жил ярьж байгаа. Цахим гэмт хэрэг багагүй гардаг боллоо. Үүнийг цэгцлэх шаардлагатай. Засгийн газрын түвшинд холбогдох судалгаа, шинжилгээг хийж байгаа гэдгээ мэдээлсэн. БНХАУ, ОХУ, Герман, Япон зэрэг улсад цахим орчинг хуульчилж, цэгцэлж байна. Иймд хуульчлах нь зөв гэсэн байр суурьтай байгаа. 

Өөрийн нэр, зураг, регистрийн дугаараар нэвтрүүлэх талаар ярьж байна. Ийм зөв соёл түгээх нь чухал. Мөн хувь хүний мэдээллийг хамгаалах асуудал байгаа. Манайхаас бусад орон фейсбүүк зэрэгт өөрийн овог, нэрээр бүртгүүлж байна. Манайд үүнийг хуульчлах ёстой. 

Регистрийн дугаараар бүртгүүлж болох талаар манай мэргэжлийн байгууллагууд ажил хийж байгаа юм билээ. Өчигдөр ХХМТГ-аас 650 мянган бүртгэлгүй дугаар байсныг 42 мянга болгож буурууллаа гэж мэдээлсэн.  

---