СПОРТ
ХӨГЖИМ
™ watch

НМХГ: “Singapore school of Mongolia” сургуулийн цайны газрыг хаасан

Нийтэлсэн
4 жилийн өмнө


Сурталчилгаа
Нийтэлсэн:   С.БУДРАГЧАА
4 жилийн өмнө

 

Баянзүрх дүүргийн 26 дугаар хорооны нутаг дэвсгэрт байрлах “Singapore school of Mongolia” сургуулийн 84 хүүхэд хоолны хордлогод гэдэг мэдээллийг дагуу манай сурвалжлах баг тус сургууль дээр очиход тус сургууль сурагчдийн амралт эхэлсэнтэй холбогдуулан үйл ажиллагаагаа түр зогсоосон байдалтай байв.

Иймд НМХГ, МХЕГ, ХӨСҮТ-ийн тандалт судалгааны баг тэр оройноос эхлэн “Singapore school of Mongolia” сургуулийг шалгах ажлыг эхэлжээ.

Хоолны хордлогод орсон хүүхдүүдийн биеийн байдал ямар байгааг ХӨСҮТ-ийн Эрт сэрэмжлүүлэг, хариу арга хэмжээ авах нэгжийн дарга Н.Сувдмаагаас тодруулахад “ХӨСҮТ-д энэ сарын 04-ний өдөр 22 цаг 30 минутад “Singapore school of Mongolia”  сургуулийн таван сурагч гэдэс хүчтэй базалж өвдөх, гүйлгэх, суулгах, халуурах гэх мэт шинж тэмдэгтэй таван хүүхэд яаралтай тусламжийн тасагт хандсан. Энэ мэдээллийн МХЕГ, НМХГ-тай хамтран манай тандалт судалгааны лабораторийн нэгдсэн баг шуурхай хариу арга хэмжээ авч ажилласан. Тус сургуулийн 200 гаруй хүүүхэд, багш ажилчдад тандалт хийж, 84 хүнийг тодорхойлсон.

Тэдгээр хүмүүсийн 44 нь ХӨСҮТ-д, 39 нь өрхийн эмчийн хяналтад, нэг хүүхэд нь дүүргийн нэгдсэн эмнэлэгт хэвтэн эмчлүүлж байна.

Үйлчлүүлэгчдээс авсан сорьцоор цусан суулга өвчний үүсгэгч урьдчилсан байдлаар илэрсэн.

Энэ өвчний үүсгэгчийн эсрэг хариу хэмжээг хордсон хүүхдүүд болон тухайн сургууль дээр авч ажиллалаа. Хүүхдүүдийн биеийн байдал сайжирч байгаа. Сэхээнд орсон хүүхдүүд одоо тасаг руу шилжсэн”  гэсэн юм.

Халдварт өвчний голомтод бүсэд ажилласан НМХГ-ын Эрүүл мэнд, боловсрол, соёлын хяналтын хэлтсийн дарга Д.Цэнд-Аюушаас “Singapore school of Mongolia” сургуулийн нөхцөл байдал ямар байсныг тодруулахад “Нийслэлийн мэргэжлийн хяналтын газарт 2019 оны дөрөвдүгээр сарын 05-ны өдөр ХӨСҮТ-өөс БЗД-ийн 26 дугаар хороонд үйл ажиллагаа явуулдаг “Singapore School of Mongolia” сургуулийн найман хүүхэд цусан суулга өвчнөөр өвчилсөн" гэсэн дуудлага мэдээлэл өгсөн. Дуудлагын дагуу БЗД-ийн мэргэжлийн хяналтын албанаас тухайн сургуульд очиж халдварын голомтод тандалт судалгаа хийж ажиллалаа. Тус сургуулийн цайны газрын үйл ажиллагааг түр хугацаагаар зогсоож, үдийн цайнд хэрэглэж байсан бүтээгдэхүүнүүдээс 43 дээж авч УМЭАЦТЛ-д өгсөн.

Лабораторийн шинжилгээний дүн хараахан гараагүй байна. Хордлогод орсон хүүхдүүд Тахианы махан шницель идсэн гэж хэлсэн. "Үдийн цай" хэрэгжүүлэгч аж ахуйн нэгжийн мэдүүлснээр

"Хүчит шонхор" захын тахианы мах авсан гэх лангууг түр хугацаагаар хааж, тахианы махыг нь хураасан.

Лабораторид найман дээжийг нь өгч шинжлүүлэх ажлыг хийлээ. Тухайн тахианы махыг урдаас оруулж ирсэн юм билээ. Эцсийн хариу 3-5 хоногт гарна. Шалгалт явцад тус сургуулийн хоолны газрын нэг бэлтгэгч нь ариун цэврийн шинжилгээнд хамрагдаагүй байсан. Бусад эрүүл ахуй, ариун цэврийн шаардлага хангахгүй нөхцөлд үйл ажиллагаа явуулж байсан гэсэн дүгнэлт үзлэгээр гарсан” гэв.

“Singapore school of Mongolia” сургуулийн албан ёсны цахим хуудаст орж танилцуулгыг үзэхэд “Singapore school of Mongolia” төслийн санаачлагч, хэрэгжүүлэгч нь “Улааччандмань” ХХК байв. 

“Улааччандмань” компани нь Налайх дүүргийн хоёрдугаар хороонд бүртгэлтэй, Барамсай овогтой Галбадрах гэдэг ганц эзэмшигчтэй 2005.08.03-ны өдөр байгуулагдсан компани аж.

Анх нярав, эксковатор, бульдазор, ня-бо бүртгэл, компьютер, автын жолоо засварын мэргэжил олгох түр курс, Ердийн мэдээлэл зүйн гүнзгийрүүлсэн сургалт, хүнд машин механизмын сургалтын чиглэлээр үйл ажиллагаа явуулах чиглэлтэйгээр байгуулагдсан энэ компани өдгөө хувийн эмнэлэг, хувийн цэцэрлэг, МСҮТ зэрэг 10 гаруй чиглэлээр үйл ажиллагаа явуулдаг охин компанитай групп болон өргөжжээ.

“Singapore school of Mongolia” сургууль нийт 350 хүүхэд хүлээн авах хүчин чадалтай ч өнөөдрийн байдлаар 9 бүлэгт 222 хүүхдийг сургаж байгаа юм байна.

 

Сурталчилгаа

Манай хуудсыг дагаарай!


© 2019 livetv.mn. Бүх эрх хуулиар хамгаалагдсан.
Мэдээлэл хуулбарлах хориотой.