Орон сууцны нэгдүгээр давхарт үйл ажиллагаа явуулж байгаа согтууруулах ундаагаар үйлчилдэг газруудын ажиллах цагийн хязгаарыг шөнийн 00:00 цаг хэмээн өөрчиллөө. Иргэдийн ая тух, амгалан тайван байдлыг хангах зорилгоор өвөл, зуны улирлаас хамааралгүй хязгаарыг тогтоосон байна. Захирагчийн ажлын албаны дарга Т.Гантөмөр “Орон сууцнаас тусдаа болон орон сууцнаас бусад зориулалтын байранд үйл ажиллагаа явуулж байгаа үйлчилгээний газрууд нь зун буюу аялал жуулчлалын улиралд 04:00 цаг хүртэлх хуваариар ажиллах боломжтой.

Харин өвлийн цагийн хуваарийг богиносгосон байдлаар зохицуулах хэрэгтэй” гэдгийг хэлэв. Архидан согтуурахтай тэмцэх тухай хуульд нэмэлт өөрчлөлт орсонтой холбогдуулан согтууруулах ундаагаар үйлчлэх тусгай зөвшөөрөлтэй газруудын үйл ажиллагаа явуулах цагийн хязгаарыг 04:00 цагаар тогтоосон байдаг. Тусгай зөвшөөрөлтэй 6472 аж ахуйн нэгж нийслэлд байдаг бол нийтийн орон сууцны нэг болон суурийн давхарт 557 ресторан, баар, кафе ажиллаж байгааг тэрбээр танилцуулгадаа дурдлаа. Тусдаа зориулалтын байртай үйлчилгээний газруудын ажиллах цагийн хуваарьт өөрчлөлт оруулах асуудлыг дахин судалж, хэлэлцэхээр тогтсон ажээ.

---