"Жаст групп" ХХК-ийн захирал Ш.Батхүү Эрдэнэт үйлдвэрийг барьцаалан Өмнөд Африкийн Стандарт банкнаас 160,1 сая ам доллар зээлсэн аж. Уг зээлийн төлбөрт  төлөх 40 сая ам.долларыг Эрдэнэт үйлдвэрийн Эрсдлийн сангаас гаргаж төлжээ

Энэ асуудлаар өнөөдөр Шадар сайд Ө.Энхтүвшин, Эрдэнэт ТӨҮГ-ын дарга Х.Бадамсүрэн нар сэтгүүлчдэд мэдээлэл өглөө. 

Ө.Энхтүвшин "Дундын зуучлагч гаргаж, хэлэлцээр хийж байж 115 сая долларыг 40 сая ам.доллараар хааж чадлаа. Юуны өмнө энэ зээлийн түүхийг товч хэлье. Анх "Жаст групп"-ийн захирал "Ш.Батхүү Өмнөд Африкийн Стандарт банктай 2009-2010 онд зээлийн гэрээ байгуулж, 2012 он хүртэлх хугацаанд хэд хэдэн удаа нэмэлт хийж, нийтдээ 160,1 сая долларыг авсан юм билээ. Хугацаандаа зээлээ төлөөгүй учраас Стандарт банк 2013 оны долоодугаар сард Олон улсын арбитрын шүүхэд ханджээ. 

Ш.Батхүүг Стандарт банкнаас зээл авахад Эрдэнэт үйлдвэр баталгаа гаргасан гэх үндэслэлээр
51 сая ам.долларын өр, 41.22 сая ам.долларын хүү дээр нэмээд шүүхийн зардал, сар тутамд өсөн нэмэгдэх хүү зэргийг нэмж нэхэмжлэл гаргажээ. 

Лондоны шүүхээр энэ хэргийг 2015-2016 онуудад нийтдээ 4 удаа авч хэлэлцээд Эрдэнэт үйлдвэрээс нэхэмжилсэн 86,95 сая ам.долларыг төлөх нь үнэн гэж баталгаажуулжээ.

Ш.Батхүү захирал "хуурамчаар гарын үсэг зурж, зээл авсан" гэж хэлсэн ч Лондоны шүүх "51 сая ам долларыг Эрдэнэт үйлдвэр төлөх ёстой" гэсэн шийдвэр гаргалаа. Уг нь Стандарт банк 86,95 сая ам.долларыг нэхэмжилсэн ч 35,95 сая ам.долларыг шүүхээс "үндэслэлгүй" хэмээн хассан байна. Энэ шийдвэр 2016-09-20 нд гарсан.

Монгол улсын Засгийн газар энэ шийдвэрийг хүлээн зөвшөөрөөгүй. Английн дээд шүүхэд давж заалдах гомдлоо өгсөн ч давж заалдахын тулд нэгэнт шийдвэр нь гарчихсан 51 сая ам.долларыг Стандарт банкны дансанд байршуулсан байж давж заалдах эрхээ олж авах ёстой гэсэн хариу ирсэн.

Стандарт банк бас Английн дээд шүүхэд бас хандсан. Эцэст нь Английн дээд шүүх Арбитрийн шүүхийн шийдвэртэй ижил шийд гаргасан.

Хэрэв бид энэ зээлийг төлөхгүй бол

- Эрдэнэт үйлдвэрийн гүйлгээ, төлбөрийн үйлчилгээг царцаах
- Гурав дахь этгээдэд өрийг зарах
- Эрдэнэт үйлдвэрийн удирдлагуудыг гадагш, дотогш нэвтрүүлэхгүй байх зэрэг маш олон эрсдэл үүсэх байсан.

Иймээс уг өрийг төлөх шийдвэрийг Засгийн газар гаргаж Эрдэнэт үйлдвэрийн Эрсдлийн сангаас 40 сая ам.доллар гаргаж төллөө. Дундын зуучлагчаар дамжуулан хэлэлцээ хийхэд "40 сая ам.долларыг төлчихвөл асуудлыг дуусгавар болгоё" гэж мэдэгдсэн байна. 40 сая ам.долларыг төлсөн тухай бичиг ирсэн. Одоо бид дотооддоо асуудлаа шийдэж, буруутай этгээдүүдээр энэ мөнгийг гаргуулах тал дээр анхаарч ажиллана" гэлээ.

"Эрдэнэт үйлдвэр" ТӨҮГ-ын захирал Х.Бадамсүрэн

"Эрдэнэт үйлдвэрийн эрсдэлийн сангаас 40 сая доллар гаргасны дараагаар үйлдвэрийн үйл ажиллагаанд ямар нэгэн өөрчлөлт, доголдол гарахгүй" гэлээ. 

---