КИМ ЖОН УН ЗОЧДОО ЁСЛОЛ ХҮНДЭТГЭЛТЭЙГЭЭР УГТАН АВЛАА

Өнөөдөр Өмнөд Солонгос улсын Ерөнхийлөгч Мүн Жэ Ин, тэргүүн хатагтай Ким Жун Сүкийн хамт Умард Солонгос улсын нийслэл Пхеньянд хөл тавилаа. Өмнөд Солонгосын төрийн тэргүүн 10 гаруй жилийн дараа анх удаа Умард хөршдөө айлчилж байгаа бол залуу удирдагч Ким Жон Ун 2011 онд улсаа удирдаж эхэлснээсээ хойш анх удаа гадны зочдыг нисэх буудал дээр биечлэн угтаж мэндчилсэн байна. Ким Жон Ун гэргий Ри Сол Жугийн хамт угсаа гарал нэгт ахан дүүсээ хүлээж авсан юм. Тэд гуравдахиа нүүр тулан уулзаж байгаа нь энэ юм. Пхеньяны Сунан нисэх буудал дээр Умард Солонгосчууд өнгө өнгийн цэцэгс, үндэсний далбаагаа намируулан, цэргийн хүндэт ая эгшиглүүлэн, ёслол хүндэтгэлтэйгээр зочдоо угтсан. Угтах ёслол ойролцоогоор 15 минут үргэлжилсэн байна. Өрнөдийн хэвлэлүүд, шинжээчид тэднийг халуун дулаан уур амьсгалтайгаар уулзаж байгааг онцолжээ.

МҮН ЖЭ ИН СОЛОНГОСЫН ХОЙГИЙГ ЦӨМИЙН ЗЭВСЭГГҮЙЖҮҮЛЭХЭД ЗУУЧЛАГЧИЙН ҮҮРЭГ ГҮЙЦЭТГЭЖ БАЙНА

Өнгөрсөн хавар, зун урьдчилан таамаглахын аргагүй гэнэтийн уулзалтууд болж Умард Солонгос улсын удирдагч хамгийн их дайсагнадаг АНУ-ын Ерөнхийлөгч Дональд Трамптай уулзсан. АНУ-ын Умардад тавьж буй гол шаардлага нь цөмийн зэвсгийн хөтөлбөрөө бүрэн зогсоох юм. Хэрэв Солонгосын хойгийг цөмийн зэвсгийн аюулаас бүрэн ангижруулбал худалдаа, эдийн засгийн хоригуудаа цуцлахаа мэдэгдсэн. Харин Умард Солонгос улс АНУ эдийн засаг, улс төрийн хориг арга хэмжээнүүдээ зөөллөж эхэлбэл алхам алхмаар цөмийн хөтөлбөрөө зогсооно гэсэн байр суурийг баримталж байгаа. Яг энэ асуудал дээр талууд харилцан адилгүй байр суурьтай, яриа хэлэлцээр царцсан байгаа тул  АНУ-ын Төрийн нарийн бичгийн дарга Майк Помпеогийн айлчлалыг цуцалсан. Гэхдээ Ким болон Трамп нар хоёр дахиа нүүр тулан уулзах тухай хэлэлцэж байгаа. Өмнөд Солонгос улсын хувьд 1-рт Солонгосын хойгийн аюулгүй байдлыг хамгаалж, хамтын ажиллагаа хөгжин цэцэглэлтийг дэмжих, 2-рт Пхеньян-Вашингтоны хэлэлцээрт гол зуучлагчийн үүрэг гүйцэтгэж байна. Энэ удаагийн Мүн Жэ Ин, Ким Жон Ун нарын уулзалтаар цөмийн хөтөлбөрийг зогсооход дорвитой, бодит алхам хийх тухай дахин хэлэлцэнэ гэж шинжээчид хүлээж байна.

 

ЗОЧДЫН БҮРЭЛДЭХҮҮНД ТОМООХОН БИЗНЕС ЭРХЛЭГЧИД БАГТЖЭЭ

Мүн Жэ Ин Пхеньянд гурав хоногийн хугацаатай айлчилна. Өнөөдөр үдээс хойш задгай дээвэртэй машинаар гэргийн хамт хотын дундуур аялж, угсаа нэгт ахан дүүстэйгээ мэндчилнэ. Айлчлал хийж байгаа зочдын бүрэлдэхүүнд Samsung, LG, Hyundai, SK Group зэрэг Өмнөд Солонгосын томоохон үйлдвэр, технологийн компаниудын төлөөлөгчид багтжээ. Энэ нь магадгүй хоёр улсын эдийн засгийн харилцааг хөгжүүлэх томоохон боломж байж болох юм. Хөрш орнууд арав гаруй жилийн өмнө хилийн дагуу Кэсонг аж үйлвэржсэн бүсийг байгуулж Умард Солонгосын олон арван мянган иргэнийг ажиллуулж байсан. Гэсэн ч хоёр жилийн өмнө Умардын тал дөрөв дэхээ цөмийн туршилт хийснээр үйл ажиллагаа нь зогссон. Бизнесийн төлөөлөгчдөөс гадна урлаг соёлын нэр алдартай төлөөлөгчид Ерөнхийлөгч Мүн Жэ Инийг дагалдсан байна. К-pop дуучин Айле, Зико, хөвгүүдийн Block B хамтлагийн ахлагчийн хамт Пхеньяны тайзан дээр дуулна. Нөгөө талаасаа Сөүлийн зүгээс соёлын дипломат бодлого явуулж буй хэрэг юм.

Эх сурвалж: www.bbc.com, www.cnn.com

 

 

 

 

---