Хууль тогтоох шатны байгууллага таны амьдралд хэрэгтэй, шаардлагатай шийдвэр гаргаж байна гэж та боддог уу? Хэрэв тэд ажлаа хийж чадахгүй бол технологийн эрин үед эрх баригчдын өмнөөс шийдвэр гаргах хиймэл оюун ухаан хөгжиж байгаа гэдгийг санах хэрэгтэй.

Европын орнуудад хийсэн судалгаагаар оршин суугчид амин хувиа хичээсэн, ашиг хонжоо харсан шийдвэр гаргагчдаас илүү технологийн дэвшилтэд итгэж байгаагаа илэрхийлжээ. Судалгаанд оролцсон иргэдийн ¼ нь хиймэл оюун ухаан одоогийн эрх баригчдаас сайн шийдвэр гаргана гэдэгт итгэж байна гэсэн хариултыг өгчээ.

Их Британи, Испани, Герман, Франц, Ирланд, Итали, Нидерландаас ирсэн 2,500 иргэнээс дээрх судалгааг авчээ. Судалгаанд оролцогчдын талаас илүү нь ажлын байраа роботуудад алдана гэхээс эмээдэг гэсэн хариулт өгсөн бол 70 хувь нь технологийн шинэчлэлийг сайн судалж туршихгүй бол нийгэмд сайн гэхээс илүү хор уршиг болж магадгүй гэжээ.

Хэдий тийм ч судалгаанд оролцогсдын үлдсэн 30 орчим хувь нь хиймэл оюун ухааны гаргасан шийдвэр улс төрчдөөс илүү гэж үзсэн нь сонирхол татаж байгаа юм. Орчин үеийн нийгэмд эрх баригчид болон иргэдийн дунд үл итгэлцэл газар авсан гэж мэргэжилтнүүд үзэж байна.

 

Эх сурвалж: www.qz.com

---