"Оюутолгой"ХХК-ийн гадаад удирдлага ажлын байрны хөдөлмөрийн хэвийн бус нөхцлийг бууруулж хассанд ажилчид бухимдалтай байгаа талаар өнөөдөр Оюутолгой дахь Үйлдвэрчний эвлэлийнхэн мэдээлэл хийлээ.
Оюунтолгойн хүнд хортой нөхцлүүд сайжирсан гэх дүгнэлтийг АШУҮИС-ийн дэргэдэх Хөдөлмөр орчны эрүүл мэндийн институтээр хийлгэсэн байна. Уг байгууллага нь 90 ажлын байрны 329 ажилтанд ажлын байрны хөдөлмөрийн нөхцөл дээр үнэлгээ хийжээ.

Хөдөлмөрийн хортой, халуун хүнд нөхцөлтэй холбоотой ажлын байрны хөдөлмөрийн нөхцөлийн үнэлгээ хийж, дүгнэлт гаргах асуудлыг Хөдөлмөрийн эрүүл мэнд судлалын төв нь хариуцаж гүйцэтгэнэ гэж заасныг зөрчиж эрхгүй этгээдээр дүгнэлт гаргуулсан

Энэхүү үнэлгээний дүгнэлтээс үүдэн 200 ажилтны хэвийн бус нөхцлийг хэвийн болгож, хэвийн бусын нэмэгдлийг хассан байна. Хэвийн бус нөхцөлийн нэмэгдэл нь үндсэн цалингийн 13 хувь байдаг юм байна.
Оюутолгой дахь үйлдвэрчний эвлэлээс хэвийн бус нөхцөлийг хассан үйлдэл нь хэд хэдэн хууль тогтоомжийг зөрчсөн хэмээн удирдлагууддаа мэдэгдсэн ч хүлээж аваагүй гэнэ.

Монголын хуульчдын холбооны гишүүн хуульч Б.Тунгалагнаран “Мэргэжлийн бус байгууллагаар хөдөлмөрийн байрны үнэлгээг хийлгэж, хүнд хортой нөхцөлийг нэмэгдлийг хассан нь хэд хэдэн хууль тогтоомжийг зөрчсөн. Тодруулбал,

1. Нийгмийн хамгаалал, хөдөлмөрийн сайдын 2004 оны "Тэтгэврийг хөнгөлөлттэй тогтоох Газрын доор болон хөдөлмөрийн хортой, халуун, хүнд нөхцөлд хамаарах ажил, мэргэжлийн жагсаалтыг шинэчлэн батлах тухай 77 дугаар тушаалыг зөрчсөн. Тодруулбал, Нийгмийн хамгаалал, хөдөлмөрийн сайдын тушаалаар хөдөлмөрийн хэвийн бус нөхцөл гэж тогтоосон ажлын байрыг хэвийн болгосон.

Манай Үйлдвэрчний эвлэлийн хорооноос хэвийн бусыг нь буцаан олгохын зэрэгцээ хасагдсан хугацааных нь нөхөн олговрыг олго гэсэн байр суурьтай байна

2. Хөдөлмөрийн сайдын 2015 оны А223 тоот тушаалын хавсралт "Ажлын байрны хөдөлмөрийн нөхцөлийн үнэлгээ хийх журам"-ын 3.6-р зүйл: Хөдөлмөрийн хортой, халуун хүнд нөхцөлтэй холбоотой ажлын байрны хөдөлмөрийн нөхцөлийн үнэлгээ хийж, дүгнэлт гаргах асуудлыг Хөдөлмөрийн эрүүл мэнд судлалын төв нь хариуцаж гүйцэтгэнэ гэж заасныг зөрчиж эрхгүй этгээдээр дүгнэлт гаргуулсан.

Үйлдвэрчний эвлэлийн хорооны дарга Ц.Дэлгэрхүүгээс "Оюу толгой" компани ямар байр суурьтай байгааг тодруулахад "Эрх бүхий байгууллагаар дахин үнэлгээг хийлгэе, харин хасагдсан хугацааны нэмэгдлийг нөхөн олгохгүй гэж байгаа. Харин манай Үйлдвэрчний эвлэлийн хорооноос хэвийн бусыг нь буцаан олгохын зэрэгцээ хасагдсан хугацааных нь нөхөн олговрыг олго гэсэн байр суурьтай байна" хэмээлээ.

---