Боинг компани 777 загварынхаа шинэ хувилбар “Боинг 777х-9” загвараа танилцууллаа. Вашингтон дахь Боингийн үйлдвэр дэлхийн хамгийн том хос хөдөлгүүртэй тийрэлтэт онгоцыг үйлдвэрлэжээ. Онгоцны их биеийг хийж дууссан ч нислэг үйлдэхэд бүрэн бүтэн, аюулгүй байдлыг хангаж баталгаажуулах хүртэл дахин нэг жил турших юм. Онгоцны хөдөлгүүрүүд, электрон төхөөрөмжүүд бүрэн дуусаагүй. Ерөнхий хэв загварын хувьд 99 жилийн турш үйлдвэрлэсэн загваруудаас хамгийн өргөн далавчтай, шатахуун зарцуулалт болон үйл ажиллагааны зардлаа 10 хувиар хэмнэх бүтэц зохион байгуулалттай. Ирэх жилээс туршилтын нислэгээ эхлүүлж 2020 онд ашиглалтад оруулах аварга том онгоц 350-425 зорчигчийн багтаамжтай. 14,000 км агаарын зам туулах хүчин чадалтай. Луфтанса, Олл Ниппон Эйрвэйс, Эмирт компаниуд захиалгаа аль эрт өгсөн байна. “Боинг 747” болон “Эйрбус А380 Супер Жамбо” онгоцууд 4 тийрэлтэт хөдөлгүүртэй бол “Боинг 777х” хос тийрэлтэт хөдөлгүүртэйгээрээ онцлог. Боинг компани “х” загварын онгоцуудаа бага хүчин чадлаар хол зам туулахад анхаарлаа хандуулж байна.

Эх сурвалж: www.cnn.com

 

---