Иргэн Т.Ганболд нь Д.Дорлигжавыг Улсын ерөнхий прокурорын алба хашиж байхдаа өөрийг нь дарамтлан 4 сая ам.долларыг дээрэмдсэн авсан гэсэн утга бүхий мэдээллийг олон нийтэд тараасан билээ.

Иймд өнөөдөр Д.Дорлигжавын өмгөөлөгч болох Э.Амархүү, Т.Мөнх-Оргил нар мэдээлэл хийсэн юм.

Т.Ганболдын хэлж буй 4 сая ам.доллар нь өмнөх бизнесийн харилцааны явцад үүссэн өр төлбөрийг шилжүүлсэн асуудал байтал төрийн өндөр албан тушаал хашиж байсан хүний хамаарал бүхий этгээдэд авлига өгсөн мэтээр тайлбарлаж байгаа нь санаатайгаар хэлмэгдүүлж, гүтгэж байна. Өмгөөлөгч Т.Мөнх-Оргил “Дээрх 4 сая ам.долларын шилжүүлсэн гэх мөнгө нь Голомт банкаар дамжигдсан хуулга нь байгаа. Ер нь бол дансаар авлига өгдөг тэнэг гар байхгүй. Д.Дорлигжав дээрх мөнгөнөөс ганц ч зоос аваагүй гэдгийг мэдэгдмээр байна. Ямар учраас гүтгэж байгааг шүүхийг байгууллага тогтоох байх” гэсэн юм.

Д.Дорлигжавын өмгөөлөгч Э.Амархүү: Гүтгэлгийн чанартай гэмт хэрэг. Бид эцсээ хүртэл тэмцэнэ

-Хэвлэлийн хурлын үеэр дурдсан компаниудтай Д.Дорлигжав холбоотой юу?

-Д.Дорлигжав эдгээр компаниудтай ямар ч холбоогүй. Энэ мөнгөнөөс ганцыг ч аваагүй. Энэ бол цэвэр гүтгэлгийн чанартай. Гүтгэлгийн чанартай гэмт хэрэг. Бид эцсээ хүртэл тэмцэнэ.

-Энэ хүнийг гүтгэх ямар шалтгаан байна вэ?

-Энэ хүнийг гүтгэх шалтгаан бол маш олон төрлийн шалтгаан байж болно. Өс хонзон юу ч байж болно. Гэхдээ үүнийг тогтоохоос нааш мэдэхгүй. Тэр хүнийг юу бодож байгааг бид мэдэхгүй.

-Т.Ганболд, Дорлигжав хоёр урьд нь холбоотой байсан уу?

-Ямар ч холбоотой байгаагүй. Д.Дорлигжав гуай мэдэгдэхдээ “Би энэ хүнтэй ганц ч удаа уулзаж байгаагүй” гэсэн байдаг.

-Яагаад 4 сая ам.доллараар гүтгэж байгааг юу гэж харж байна вэ?

-Өнөөдөр олон нийтэд нэг гэрээний нэгхэн зүйл заалтыг аваад эн дээр тайлбар хийж байгаа нь, хавтаст хэргийн мэдээллийг задруулж байна. Өөрт байгаа хавтаст хэргийн материалыг задруулах эрхтэй байсан юм бол бүтнээр нь задруулах эрхтэй. Яагаад бүтнээр задруулж болохгүй байгаа юм бэ. Энэ нь мөрдөн шалгах ажиллагааны нууцлал юм бол уг нууцлалыг даваад задруулаад байгаа. Энэ хүн мөрдөн шалгах үйл ажиллагааны нууцыг задруулсан. Зөвшөөрлийг дагуу задруулсан юм бол хавтаст хэрэгт байх ёстой. Хэрвээ байхгүй байвал энэ хүн хуулийн дагуу хариуцлага хүлээх ёстой. Хэрвээ энэ хүн тэр зөвшөөрөл нь байхгүй байгаад хавтаст хэргийг хууль бусаар задруулсан байгаад тэгээд энэ хүн дээр хариуцлага тооцогдохгүй байвал энд өөр нэг асуудал гарч ирнэ.

Шүүхээс үнэн мөнийг тогтоож, Т.Ганболд Д.Дорлигжавыг гүтгэсэн гэдгийг эхний ээлжинд,  дараа нь яагаад гүтгээд байгаа гэдгийг тогтоолгоно.

---