Улаанбаатар хотын томоохон захын нэг Баянзүрх захын махны худалдааны тасгаар үнэ ханш хэдэн төгрөг байгаа талаар судаллаа. Баянзүрх захын махны тасагт шинэ махны сонголт ихтэй байсан ч үнэ ханшийн хувьд нэлээн өссөн байв. Хонины ястай мах нэг килограмм нь 7200, хонины цул мах 8000, үхрийн мах 8500-8800, хонины сүүл 6500, адууны цул мах 8200 төгрөгөөр худалдаалж байлаа.

Худалдагч нарын хувьд “худалдан авалт муу байгаа. Хятадууд мах авч байгаа учраас зун, намрыг бодвол махны үнэ нэлээн өссөн. Бид нарын хувьд урьд нь 10 хонь аван зардаг байсан бол худалдан авалт тааруу болсноос хойш таван хонь авч зарж байна. Ер нь бол хэцүү байна ш дээ” хэмээв.

Баянзүрх захаас мах худалдан авч байгаа иргэдийн хувьд таван килограммаас илүү мах авч байгаа харагдахгүй байлаа. Тус захаас худалдан авалт хийж явсан иргэн Энхжаргал “Махны үнэ үнэтэй байна, авч дийлэхгүй л юм. Удахгүй цагаан сар болох гэж байдаг. Энэ янзаараа байвал цалин, тэтгэврийн мөнгө бууз, ууцандаа хүрэхгүй юм шиг байна. Урьд нь үхрийн нэг кг махыг 6000 гаруй төгрөгөөр авдаг байсан ч одоо 7000-8000 төгрөгийн үнэтэй зарагдаж байна” гэсэн юм.

Иргэн Дамба “Махны үнэ хоёр дахин үнэтэй байна. Худалдан авч байгаа мах маань амьжиргаанд хүрэхгүй хэцүү л юм. Хаврын тарчиг цагт энэ хэвээрээ байвал хэцүү л болох байх” хэмээв.

 

 

---