Прокурорын байгууллагаас ЖДҮХС-аас зээл авсан, энэ нь эрүүгийн шинжтэй гэсэн шалтгаанаар дөрвөн гишүүний бүрэн эрхийг түдгэлзүүлж өгөөч гэсэн бичгийг УИХ-д ирүүллээ. Нэрсийг нь харвал, хүмүүсийн ярьдгаар “чапакууд” байх нь тэр. Орхоноос сонгогдсон Д.Дамба-Очир, Баян-Өлгийн Г.Солтан, Сонгинохайрханы Б.Ундармаа, Өмнөговь аймгаас сонгогдсон Л.Энхболд нарын гишүүн хууль хяналтынхны хараанд өртжээ.

УИХ-ын гишүүн Б.Ундармаа өөрийн 100 хувийн эзэмшлийн "Доктор МЭИК" ХХК-д ЖДҮХС-аас 700 сая төгрөгийн зээл,

УИХ-ын гишүүн Г.Солтан мөн өөрийн үүсгэн байгуулсан “Монгол шаазан” ХХК-д ЖДҮХС-аас 950 сая төгрөгийн зээл, 

УИХ-ын гишүүн Д.Дамба-Очир “Сапфир стоун” ХХК-д ЖДҮХС-аас 1.2 тэрбум төгрөгийн зээл авахад нь дам байдлаар нөлөөлсөн,

УИХ-ын гишүүн Л.Энхболд төрсөн охин Э.Мандухайн нэр дээр байгуулсан “Мийт экспорт интернэйшнэл” ХХК-д ЖДҮХС-аас 1,3 тэрбумын зээл тус тус авсан юм.

УИХ-ын Халдашгүй байдлын дэд хороо өнөөдөр хуралдаж эдгээр гишүүдийн хувь заяаг дэнслэх юм гэсэн. 

Чуулган хуралдаж чадахгүй гацах үеэр Төрийн ордонд Нийслэлийн Ерөнхий прокурор Д.Баярмагнай сэтгүүлчидтэй уулзахдаа бүрэн эрхийг түдгэлзүүлэх гурван гишүүн байгаа гэж ярьж байсан. Тэдгээр нэрсийг ард түмэн М.Билэгт гишүүний хэлснээр нэг хүн эмчлүүлээд гарахад 1.5 саяыг төлдөг эмнэлэгтээ ЖДҮ оруулсан Зам, тээвэр хөгжлийн сайд Я.Содбаатар, “Газар партнер” ББСБ-тай Ж.Энхбаяр нар гэж ойлгож, хүлээж байсан. Гэтэл морь будиллаа гэдэг шиг таамгийг будлиуллаа.

Эх сурвалжийн мэдээлснээр Я.Содбаатар, Ж.Энхбаяр нар Ерөнхий сайд У.Хүрэлсүхийн дотны андууд учир жижиг гаруудаар туг тахьсан болж ард түмний нүдэн дээр жүжиг тавиад, томчуулыг нь сугалж үлдэхээр шийдсэн нь энэ гэнэ.

Я.Содбаатар сайдын суудлаа өгөх өргөдлөө өгсөн болоод Зам, тээвэр хөгжлийн яаман дээр юу ч болоогүй юм шиг ажлаа хийж байна. Засгийн газрын хуралдаан дээр Ерөнхий сайд Я.Содбаатар руу харж байгаад “хууль бус юм хийж гогдуулав аа!” гэж анхааруулж хэлсэн гэсэн яриа байна.

Ж.Энхбаяр гишүүнийг үхрийн ферм, анд найз У.Хүрэлсүх хоёр нь л аврах шиг боллоо. ХАС банкин дахь дансаараа ЖДҮ-гээ төлсөн гэж байгаа боловч, одоо болтол баримтаа харуулахгүй л байгаа.  

Нийгэмд шударга бус байдал хавтгайрсанд ард иргэд бухимдалтай байгаа. Хууль тэгш бус үйлчлээд удаж байна. Гар утас хулгайлсан хүн шоронд тарчилж байхад улсаас бүлэглэн өч төчнөөн тэрбум төгрөг хулгайлсан этгээдүүд сайд, гишүүн хийгээд тарвалзаж байна.

Шударга ёс чинь хаана байна, Ерөнхий сайд аа!?

---