Улсын ерөнхий прокурор асан Д.Дорлигжавын албан өрөө болон гэрийг Прокурорын зөвшөөрөлтэйгээр нэгжсэн тухай мэдээлсэн. Түүнийг дүү Д.Баатарын хамтаар цагдан хорьсон гэсэн мэдээлэл тархаад байсан боловч, энэ нь үгүйсгэгдэж байсан билээ. Өчигдөр түүнийг цагдан хорьсон гэдэг нь худал байжээ.

Харин өнөө өглөө түүнийг баривчилж, ШШГЕГ-ын 461-р ангид АТг-ынхан цагдан хорьжээ. Энэ нь өчигдөр “Цэнзургүй яриа” нэвтрүүлгээр “Алтан Дорнод Монгол” ХХК-ийн захирал Т.Ганболд оролцож, шинэ баримтууд дэлгэсэн, үүнээсээ АТГ-н Мөрдөн шалгах хэлтэст өгснөөс үүдсэн гэсэн мэдээлэл байна.

Т.Ганболд хэдийгээр дөрвөн сая ам.долларыг дүү Д.Баатарынх нь данс руу шилжүүлсэн гэж баримт харуулж байгаа боловч, энэ нь “дээрэм”-ийн нэгээхэн хэсэг нь гэдгээ өчигдөр илэнд далангүй хэлчихлээ.

Д.Дорлигжав нь Монгол улсын Шадар сайд, Батлан хамгаалахын сайд, Мэргэжлийн хяналтын сайд, Эрдэнэт үйлдвэрийн Ерөнхий захирал, Ерөнхий сайдын зөвлөх, Ерөнхийлөгчийн ТГ-ын дарга, Төрийн хууль цаазын тэргүүн зөвлөх, Улсын Ерөнхий прокурор, Хууль зүйн сайдын алба хашиж байсан билээ.

---