Өчигдөр буюу 12-р сарын 19-ний өглөөний 12 цагт МАН-ын бага хурал хуралдаж эхэлсэн.

Өдөржингөө хуралдсан бага хурал оройны 21.00 цагийн орчимд завсарлаж, МАН-ын Удирдах зөвлөл хуралдаж эхэлсэн юм. Ингээд бага хурлын үйл ажиллагаа дахин үргэлжилж шөнийн 24:00 цагийн үед УИХ-ын даргыг өөрийн хүсэлтээр ажлаа өгөхийг шаардсан тогтоолыг баталжээ.

Бага хуралд намын дарга буюу Ерөнхий сайд У.Хүрэлсүх УИХ-ын даргыг өөрийн хүсэлтээр ажлаа өгөх шаардлагыг оруулж ирсэн боловч УИХ-ын дарга хүлээж аваагүй байна.

Зарим гишүүдийн мэдээлж буйгаар УИХ-ын дарга УИХ-аас томилогддог субъект учраас намын Бага хурлаар түүнийг огцрох эсэх асуудлыг хэлэлцэх нь хууль зөрчиж байгаа хэлбэр гэж үзэж байгаа юм. Мөн намын Бага хурал тогтоол батлахгүй зөвхөн зөвлөмж л гаргах үүрэгтэй ч гэж тайлбарлаж байна.

Ямартай ч МАН-ын бага хурал өчигдөр хуралдаж эхэлснээсээ хойш дээрх шийдвэрийг гаргасан бөгөөд намын дүрэмд өөрчлөлт оруулах асуудлыг ч мөн хэлэлцсэн байна.

Өнөөдөр МАН-ын бага хурал үргэлжлэх эсэх нь тодорхойгүй бөгөөд 12:00 цагийн үед албан ёсны мэдээлэл өгөх хэвлэлийн хурал зарласан байна.

---