УИХ-ын гишүүн Н.Номтойбаяр өнөөдөр цаг үеийн асуудлаар мэдээлэл хийсэн юм. Тэрбээр, ЖДҮХС-тай холбогдсон нэр бүхий УИХ-ын гишүүд, засгийн сайд нарыг У.Хүрэлсүх хамгаалаад байсан учрыг нотлох баримтыг үндэслэн хүргэж байна гэсэн юм.

Түүний яриаг бүрэн эхээр нь хүргэе.

Хэрвээ өргөдлөө өгөхгүй бол би өөрийн зүгээс энэ сарын 20-нд У.Хүрэлсүхийг ЖДҮХС-тай холбогдуулан ажлаа хүлээлгэн өг хэмээн өргөдөл өргөн барина

Монгол Улсын Ерөнхий сайд У.Хүрэлсүх, МАН-ын дарга нь ЖДҮ-чдийн загалмайлсан эцэг гэдгийг мэдэж авлаа. 2016 оны арванхоёрдугаар сарын 13-нд У.Хүрэлсүх өөрийн төрсөн дүү У.Давхарбаярын нэрээр “Жаргалант мах импекс” ХХК-ийн нэр дээр 1 тэрбум 326 сая төгрөгийн зээлийг авах гэрээнд гарын үсэг зурсан байна. Улмаар 2017 оны хоёрдугаар сарын 15-нд 327.100.00 төгрөг мөн 2017 оны наймдугаар сарын 3-нд 236 сая төгрөгийг тус тус авсан байсныг тогтоолоо. Үлдэгдэл 800 орчим сая төгрөгийг авсан нь ойлгомжтой.

УИХ-ын чуулган дээр өөрийг нь огцруулах асуудал дээр шударгын баг зүүж жүжиг тавьж байсныг үнэхээр дүргүйцсэн. Шударга ёсыг эрхэмлэдэг нэгэн эмэгтэй надад эдгээр нотлох баримтыг өгсөн. Тэгэхээр ЖДҮ-чин Ерөнхий сайдтай, МАН ЖДҮ-чин намын даргатай боллоо. У.Хүрэлсүх Хөрөнгө орлогын мэдлүүлэгтээ дурдсанчлан 1.7 тэрбум төгрөгийн хадгаламжтай, хоёр орчим тэрбум төгрөгөөр үнэлэгдэх үл хөдлөх хөрөнгө, олон зуун саяар үнэлэгдэх автомашин, мотоциклиуд,  Говь Тэрэлжийн тусгай хамгаалалтад байдаг өндөр зэрэглэлийн амралтын газар гэх мэт энэ олон тэрбум төгрөгийн хөрөнгө болон үл хөдлөх хөрөнгийг амьдралдаа бизнес эрхэлж үзээгүй хүн яаж олж авсныг тайлбарлах цаг нь болжээ. Үүнийг ч бас ард иргэд хүсэж байгаа. Иймээс У.Хүрэлсүх өөрөө өргөдлөө өгөхийг шаардаж байна. Хэрвээ өргөдлөө өгөхгүй бол би өөрийн зүгээс энэ сарын 20-нд У.Хүрэлсүхийг ЖДҮХС-тай холбогдуулан ажлаа хүлээлгэн өг хэмээн өргөдөл өргөн барина .  

Хууль зүйн, дотоод хэргийн сайд Ц.Нямдорж одоо ажлаа хиймээр байна. Эрх мэдэлтний өмнө хоёр нүүр хэрхэвч гаргаж болохгүй ээ. Хууль хяналтын байгууллага ажлаа хиймээр байна. Хийж байхыг үгүйсгэхгүй.

Энэ мэдээллийг хийхэд хувь хүнийхээ үүднээс амаргүй шийдвэр байлаа. Үүнийг хийснийхээ хариуд нэлээд цохилтууд авах байх. Ялангуяа надтай холбоотой элдэв гүтгэлэг мэдээллүүдийг дэлгэн ярих байх тэр нь хамаа алга.

Эцэст хэлэхэд У.Хүрэлсүхийг ард иргэддээ шинэ жилийн бэлэг болгон өөрөө огцрох хүсэлтээ өргөн барьчих болов уу гэж маш их итгэж байна. 48 цагийн дотор өөрөө огцрох өргөдлөө өгөхгүй бол дахин огцруулах ажил руугаа орно. Маргааш намын бага хурал болно. Намын хурал дээр намын дарга ажлаа өгөх бүрэн бололцоотой.

 

 

 

 

Хэвлэлийн бага хурлын төгсгөлд УИХ-ын гишүүн Н.Номтойбаяр, Ж.Мөнхбат, Д.Хаянхярваа, М.Энхболд нарыг маргааш /12.18/ болох МАН-ын бага хурлын үеэр намаасаа хасна гэх мэдээлэл гарч байгаа. Энэ талаар түүнээс тодруулахад тэрээр “Намайг угаасаа намаасаа хөөчихсөн шүү дээ” гэсэн юм. Харин намаасаа гараад хэрхэх талаар нь асуухад “Бодсон зүйл байгаа” гэлээ.

 

---