2016 оны сонгуулиар 65 суудал авч байсан Монгол Ардын нам өдгөө У.Хүрэлсүхийн 33, М.Энхболдын 32-ын бүлэг болон хуваагдаад байгаа нь нууц биш. У.Хүрэлсүхийн тэргүүлж буй Засгийн газрыг огцруулах эсэх санал хураалт дээр энэхүү бүлэглэл, зөрчлийг ард түмэн хангалттай харж таньсан. Уран сайханы кино, шилдэг хошин шогийн үзүүлбэр ч үүний дэргэд “хандалт” авахгүй байгаа. Улстөр улайсаж, эрх баригч нар хагаралдаж байх зуурт гурван сайдын суудал онгойн, 33-ын бүлэг дотор сандал суудлын төлөөх тэмцэл хурцдаж, удахгүй биднийг үл уйдаах ээлжит цувралууд үргэлжлэх гэж байна.  

 

Ч.Улаан зэрэг нэмж чадсангүй   

Засгийн газрын гишүүн Б.Батзориг 10 дугаар сарын 31-нд ХХААХҮ-ийн сайдын суудлаасаа огцорч буйгаа мэдэгдсэн билээ. Засгийн газрын тухай хуулинд “Засгийн газрын гишүүний орон гарсан тохиолдолд УИХ 30 хоногийн дотор нөхөн томилно” гэж заасан. Энэ дагуу 11 дүгээр сарын 12-нд МАН-ын Удирдах зөвлөлөөс УИХ-ын гишүүн Ч.Улааныг зургаа дахь удаагаа сайд хийх чадамжтай хэмээн нэр дэвшүүлсэн. Гэвч сайд Б.Батзоригийн огцрох мэдэгдлээс хойш 50 хоног өнгөрөх гэж байна. Өөрөөр хэлбэл, хуулинд заасан хугацаанд У.Хүрэлсүх сайдаа томилуулж чадсангүй. Шулуухан хэлэхэд, гишүүн Ч.Улаан энэ удаад зэрэг нэмж чадсангүй. МАН-ын Удирдах зөвлөл ХХААХҮ-ийн сайдад дахин өөр хүн дэвшүүлэх болж байна. Хэн, хэний нэр яригдаж байна вэ?

 

Гурил уу, гулир уу?

ХХААХҮ-ийн сайдад нэр дэвшин дотооддоо өрсөлдөж буй эрхмүүдийн тухай сонсоод цайндаа хахчихсангүй. Боловсон хүчний баялаг нөөцтэй МАН-д Хөдөө аж ахуйн сайд хийх хүн Л.Элдэв-Очир, Ц.Болорчулуун хоёроос өөр байхгүй байна гэж үү?

Канадад Элчин зөвлөхөөр сууж байхдаа Элчин сайд Т.Залаа-Уулыг гүүрнээс дүүжилнэ гэж айлгаж байсан Л. Элдэв-Очир Байгаль орчин, хүнс, хөдөө аж ахуйн байнгын хорооны дарга гэдгээрээ гул барьж, сайд хийнэ гэж зүтгэж байгаа бол ЖДҮХС-аас 950 тэрбум төгрөгийг “Дорнод гурил” компаниараа дамжуулан авсан нь тодорхой болоод байгаа Ц.Болорчулуун яагаад Хөдөө аж ахуйн сайд болох ёстой гэж. Гурил ялах уу, гулир ялах уу гэдгийг харах үлджээ бидэнд.

 

Лүнгийн зам, Лүдийн Дамба-Очир

Зам, тээвэр хөгжлийн сайдаасаа огцрох өргөдлөө Я.Содбаатар өгөөд байгаа. Иймд түүний оронд хэнийг тавих талаар бас л дотооддоо хөөрхөн дажин болж байгаа сурагтай. Орхон аймгаас сонгогдсон Д.Дамба-Очир гишүүн магадлал өндөр байгаа гэнэ. Түүнийг сайд болоход хамгийн их саад болох зүйл бол Лүнгийн зам. Лүнгийн замыг барих нэрийдлээр лүдийн зам болгосон нүгэл түүнээс арваад жил салсангүй. Чанаргүй, муу зам тавьж улсаа хорлож байсан тэр Зам, тээврийн сайдад дэмжих болов уу?

Нам дотроо түүнтэй өрсөлдөж байгаа хүн бол гишүүн Л.Энхболд. Өмнөговиос сонгогдсон гэдгээрээ арай чүү танигдах тэрээр “Мишээл”-ийн Б.Энх-Амгалан гишүүнийг мөргөж, сайдад хүч үзэж байгаа аж. “Погдгор” жаалуудын зодоонд хэн ялах бол?

Уг нь Д.Дамба-Очир, Л.Энхболд нараас өмнө Хан-Уулаас сонгогдсон Б.Энх-Амгалан гишүүн Зам, тээвэр хөгжлийн сайдад хамгийн өндөр магадлалтай байсан гэж эх сурвалжууд ярьж байсан. Зарим нь бүр сайдын суудлаа авчихсан байсан гэж мэтгэдэг. Ордны гадаа МАН-ын енбд Д.Амарбаясгалангийн машины хаалгыг онгойлгон суулгаж байхыг харсан сэтгүүлчид “Энэ хүний сайд болох нь шуударчээ” хэмээн уулга алдаж байсан юм. Гэвч тэр мөргүүлжээ.

 

Боловсроогүй хүмүүс Боловсролын сайд хийх үү?

БСШУ-ны сайд Ц.Цогзолмаа огцрох өргөдлөө өгснөөр бас нэгэн сайдын суудлын төлөөх тэмцэл өрнөөд байна. УИХ-д хоёулаа л анх удаа сонгогдсон, улстөрийн туршлагын хувьд боловсроогүй хоёр хүн сайдын суудал мөрөөдөн, гийнаж байна. Нэг нь Өргөдлийн байнгын хорооны дарга М.Оюунчимэг, нөгөө нь Сонгинохайрханаас сонгогдсон Н.Учрал.

М.Оюунчимэгийн хувьд гишүүн болсноосоо хойш Туул голыг хамгаалах талаар их ярьж хэлж байгаа нь сайдын суудалд суух эрхтэй гэж эндүүрч байгаа бололтой.

Н.Учралын хувьд “Рояал” гэж академитай, аав нь “Их засаг” их сургуулийг байгуулсан учир Боловсролын сайдад тохирох хүн гэдгээ ил, далдаар зарласаар байна. Тэрээр Залуу багш нарын холбооны даргын сонгуультай. Залуу багш нарыг зад ёолкдуулсан байхад сайдын суудал байтугай ирнэ гэж бодож байгаа сурагтай. Гэвч түүнийг сайд болох сургаар дэлхийн сүйрлээс урьтаж зуслан руугаа зугтсан онигоо нь сөхөгдөж таарна. Муу нэрийг хусавч арилахгүй гэж энэ дээ.  

---