Дулааны III цахилгаанд станцад өчигдөр шөнө гарсан дэлбэрэлттэй холбоотойгоор "ДЦС-3" ТӨХК-д хяналт тавих Засгийн газрын БЭТ Н.Тавинбэх мэдээлэл өглөө.

"ДЦС-3" ТӨХК-д хяналт тавих Засгийн газрын БЭТ Н.Тавинбэх:

-Өнгөрсөн зургаадугаар сарын 2-ны өдөр 50 мВт турбины генератор дээр гэмтэл гарсан бөгөөд гэмтэлд өртсөн тоног төхөөрөмжийн зориулалттай барилга байгууламжид гал гарч, томоохон аваар осол болсныг бүх нийтээр мэдэж байгаа. Осолтой холбоотой тус компани дээр Засгийн газраас БЭТ томилсноос хойш 47 хоног болж байна. Энэ хугацаанд сэргээн босголтын ажлыг эрчимтэй явуулж, гүйцэтгэл сайн явж байгаа учраас төлөвлөсөн хугацаандаа ашиглалтад орно. Цахилгаан эрчим хүчийг хэвийн хэмжээнд явуулж, өвлийг ямар нэг хүндрэлгүйгээр давна гэдгийг хэлье.

Ашиглалтад ороод 60 орчим жил болж байгаа, өндөр насжилттай эх үүсвэр учраас техникийн саатал мэдээж гардаг. Ийм технологийн саатал 8-р сарын 1-ний өдөр гарсан. Онцгой дэглэм тогтоосон сэргээн босголтын үед сенсаци болгож, дотроос мэдээлэл гаргаж байгаа нь зохимжгүй явдал гэж үзэж байна. Засварын ажил эхэлчихсэн явж байна. Гэмтсэн зуух ашиглалтад ороод 50 орчим жил болсон бөгөөд анх удаа ийм осол гараагүй. Өнгөрсөн онд өвлийн ачааллын үед 15 удаа осол гарсан.

Засгийн газраас томилсон БЭТ-ийн хувьд зөрчлүүдийг арилгахад хатуу арга хэмжээ авч ажиллаж байгаа нь зарим хүнд таалагдахгүй байх шиг байна. Эдгээр хүмүүс хэвийн ослыг олон нийтэд дэлгэж, энэ станц дээр хийж байгаа шинэчлэлийн ажилд саад болж байгааг хуулийн байгууллагад шалгуулна.

Үйлдвэрлэлийн осолд өртсөн нөхөддөө туслахын оронд бичлэг хийж, гадагш нь зарсан асуудал энэ хамт олны дотор байх ёсгүй. Ажил хийдэг мэргэжлийн хүн байх ёстой.

Станцын нийт тоноглолын 70 хувийн ашиглалтын хугацаа дууссан. Дор хаяж 60 хувийг бүрэн шинэчлэх шаардлагатай байгаа. Хоёр дэлбэрсэн турбин бол Монголд засварлах боломжгүй учраас энэ чиглэлээр дэлхийд тэргүүлэгч компаниудаас санал авч, шинээр суурилуулна. Энэ жил турбинуудыг ажилд оруулж амжихгүй. 2026 оны өвлөөс урьтаж ажилд оруулахаар төлөвлөж байгаа. Бид төвийн эрчим хүч дээр ачаалал үүсгэлгүй, нийслэлийн дулаан хангамжийг тасалдуулахгүйгээр хэвийн ажиллана гэв.

---