Төв аймгийн Жаргалант сумын нутаг дахь “Тэн хун” ХХК-ийн Нарантолгойн уурхайд тавдугаар сарын 28-ны үдэш осол гарч, ажилчин нь амиа алдсан юм. Аавтайгаа хоёулхнаа амьдардаг 28 настай Н гэх залууг осолдсон даруйд тус сумын эмнэлэгт хүргэсэн ч эмчилгээ авч чадаагүй аж.

Талийгаач БНХАУ-ын хөрөнгө оруулалттай “Тэн хун” ХХК-ийн дээрх уурхайд туслан гүйцэтгэгч “Хун шин вэй” компанид туслахаар ажилладаг нэгэн байж. Тэрбээр уурхайн хоёрдугаар түвшнээс гурав руу буюу 60 метрийн өндрөөс доош унасан гэнэ. “Тэн хун” ХХК-ийнхан энэ ослыг талийгаачийн өөрийнх нь буруутай үйлдэл байсан гэж тайлбарлаж буй аж. Тэд “Талийгаач хөдөлмөр хамгаалал, аюулгүй байдлын дүрэм зөрчиж, нээх болоогүй байхад хаалга онгойлгосноор ийм харамсалтай явдал болсон” хэмээсэн байна. Өдгөө Төв аймгийн Цагдаагийн газарт үүнийг шалгаж буй бөгөөд мөрдөн шалгах ажиллагаа хараахан дуусаагүй гэдгийг албаны эх сурвалжууд хэлсэн бол уурхайн ажилчид “Ер нь амиа алдсан залуугийн буруутай үйлдлээс болж үйлдвэрлэлийн осол гарсан гээд хаах юм шиг байна лээ” хэмээв.

---