“Монгол Улсын Ерөнхий сайдад итгэл хүлээлгэх тухай” Улсын Их Хурлын тогтоолын төслийг чуулганы нэгдсэн хуралдаанаар хэлэлцэж байна. Хуралдаанд 126 гишүүн ирэхээс 102 нь ирж, ирц 81 хувьтай байна. Хэлэлцэж буй асуудалтай холбогдуулан УИХ-ын гишүүд асуулт асууж, байр сууриа илэрхийлж байна.

УИХ-ын гишүүн Х.Баасанжаргал:

-Залуус итгэл үнэмшилтэй, үзэл бодолтой байгаагаа илэрхийлж байна. Манай намын гишүүд ч илэрхийлж байна. Гэтэл тэдний байр суурийг мөнгө санхүү, эдийн засагтай холбож байгаа нь итгэл найдварыг бөхөөж байна.

Жишээ нь, Ч.Лодойсамбуу гишүүн бусад гишүүдээ "кнопоо худалддаг" гэх мэдэгдэл хийсэн. М.Нарантуяа-Нара гишүүн "жагсагч залуусыг жагсаалыг 50 сая төгрөгөөр багцлагдсан" гээд мэдэгдчихлээ. Яагаад бид энэ процессыг ойлгож, нэг нэгнийгээ хүлээн зөвшөөрч чадахгүй байгаа юм бэ?! Та хоёр маань хэлсэн үгээ нотолж чадахгүй бол уучлалт гуйх ёстой.

Би 126 гишүүн болон гадаах залууст итгэж байна. Тэнд миний 22 настай охин ч бий. Ямар нэг шүүлтүүр тавьж бодож болохгүй. Парламент засаглал ил тод байх ёстой. Том дохио боллоо гэж би бодож байна. 

Хоёрдугаарт, Ерөнхий сайд та МАН-ын бага хурлын гишүүдэд хандаж үгээ хэлээч.

Монгол улсын Ерөнхий сайд Л.Оюун-Эрдэнэ:

-Ганцаараа шийдвэр гаргах шиг амар зүйл байхгүй. Гэхдээ суурь асуудлаа ярья. Бага хурал 11 цаг хуралдсан. Томоохон гомдлууд орон нутаг болон парламентын гишүүдийн дунд үүсчээ гэдэг нь тодорхой болсон. Ерөнхий сайдын хувьд яаран шийдвэр гаргаж болохгүй гэж маш олон Бага хурлын гишүүн хэлсэн. Хамтраад засаглах нь энэ цаг үед зөв гэж би бодож байна. Гэвч энийг хүлээн зөвшөөрөхгүй цаг үе иржээ гэдгийг ч ойлгосон. Л.Оюун-Эрдэнэ байх байхгүйдээ биш юм билээ. Тийм учраас итгэл үзүүлэх тухай энэ асуудлыг хөндсөн юм. Бидний итгэл найдвар бол ирээдүйн хөгжил, зөв дүгнэлт байх юм. Нийгэмд олон сегмент байдаг. Тэднийг парламентэд оруулж ирэх хуулийг бид хийсэн. Одоо энэ төлөөллийн хэлцлийг үүсгэх ёстой. Энэ нь 126 гишүүнтэй парламентийн механизм юм гэв. 

---