Энэ сарын 21-нд болсон МАН-ын Бага хурлын VI хурал дээр Монгол Улсын Ерөнхий сайд Л.Оюун-Эрдэнэ юу хэлсэн, ямар байр суурьтай байсан талаар Ерөнхий сайдын хэвлэлийн төлөөлөгч Ч.Болортуяа бичжээ. Онцлох гол яриануудыг та бүхэнд товч хүргэе. 

Монгол ардын намын Бага хуралд үг хэлсэн 40 гаруй хүн "Хамтарсан Засгийн газар нь улстөрийн намын хувьд өрсөлдөгч улстөрийн хүчнээ бэхжүүлж байна. Энэ нь намын анхан, дунд шатандаа үнэхээр хурцадмал асуудал болсон" гэж ярьжээ. Иймд Ерөнхий сайд "Хамтарсан засгийн газар одоогийнхоороо явах, эсэх намд сөрөг нөлөөтэй гэж УИХ дахь МАН-ын бүлгийн тал орчим нь, Бага хурлын гишүүдийн ч бараг тал нь үзэж байх шиг байна. Миний хувьд хамтралын давуу талууд буюу олон жил гацсан төсөл, хөтөлбөрүүд эхнээсээ хэрэгжиж эхэлсэн тухай хэллээ. Мөн улстөрийн намын хувьд сөрөг талууд ч байгааг хэллээ. Та бүхэн өөрийн оюун бодолдоо тунгаагаад шийдвэрээ гаргаарай. Хамтарсан засгийн газрын хөтөлбөрт “Улсын эрх ашиг нэгдүгээрт, улс төрийн намын эрх ашиг хоёрдугаарт, эцэст нь хувийн эрх ашиг байх зарчмыг үнэт зүйлээ болгон” тусгасан. Одоогийн хамтралд хүрэхийн тулд Үндсэн хуулийн өөрчлөлтөөс эхлээд миний зүгээс маш их хүчин чармайлт гаргасан. Ардчилсан нам, ХҮН намын хувьд ч маш том зориг, тэвчээр гаргасан учир та бүхэн одоогийнхоороо явах боломжгүй гэж үзвэл би ёс зүйн хариуцлага хүлээж огцрох нь зөв сонголт болно. Гэхдээ улс орны эрх ашгийг бодолцон одоогийн хамтралыг үргэлжүүлбэл би итгэл хүлээн ажлаа үргэлжлүүлнэ ээ" гэж хэлжээ.

Бага хурал завсарласны дараа Ерөнхий сайд тайзан дээр гарч ирээд “Одоогийн саналын томъёоллоор санал хураах нь намайг огцруулах эсэх болон бусад олон салаа утгыг агуулаад байна гэсэн та бүхний болгоомжлолыг ойлгосон учир эхлээд та бүхнээс тавьсан гэрээг зөрчсөн намыг гаргах эсэхээр санал хураагаад өнөөдрийн хурлыг хаая. Та бүхний гаргасан саналын үр дүнгээс хамаараад миний хувьд хамтарсан намуудтайгаа асуудлаа зөвшилцөж, дараагийн шийдвэрээ гаргая” гэжээ. "Гэрээ зөрчсөн улстөрийн намыг Засгийн газраас гаргахыг дэмжих үү? гэсэн агуулгаар санал хураалт явуулахад Бага хурлын гишүүдийн 61 хувь нь гэрээ зөрчсөн намыг гаргахыг дэмжжээ. 

Мөн тус хурал дээр намын гишүүдийн зүгээс асуусан Ерөнхий сайдын хүүгийн асуудал, Ерөнхийлөгч асан Х.Баттулгатай холбоотой эсэх, Б.Баатар найруулагчийн тухай, гэр бүлийн хүнийхээ тухай нийгэмд байдаг янз бүрийн мэдээлэл болон УИХ-ын сонгуульд намын бус хүмүүсийг дэвшүүлсэн зэрэг асуулт, шүүмжлэлд Ерөнхий сайд хариулжээ.

Ерөнхий сайд Л.Оюун-Эрдэнэ “Миний хүүгийн асуудлыг хуулийн байгууллага шалгаад хариу нь гарах байх аа. Миний хувьд орлогоо нотолно. Орлогоо нотлох ёстой гэсэн залуусын шаардлагад хүндэтгэлтэй хандаж байгаа. Ийм эргэлзээтэй асуудал үүсгэсэндээ олон нийтээс уучлалт гуйсан. Намын нөхдөөсөө ч уучлалт гуйж байна. Хувь хүний асуудалд та бүхэн эргэлзэх хэрэггүй, үнэн мөнөөрөө тогтоогдоод гараад ирнэ.

Б.Баатар найруулагчийн тухайд энэ хүн миний төрсөн ах нь үнэн. Харин Ерөнхийлөгч асан Х.Баттулгатай холбоо, хамааралтай гэж намайг ярьдаг яриа бол домог юм.

Би Бэрхэд нүүж очсон цагаас хамар хашааны, нэг ангийн охинтойгоо гэр бүл болж өнөөдөр бид гурван хүүхэдтэйгээ амьдарч байна. Гэр бүлийн хүнийг маань Б.Туул гэдэг.

Нам бус хүмүүсийг УИХ-д дэвшүүлсэн нь Үндсэн хуулийн өөрчлөлтийг “амилуулах” парламентыг салбар бүрийн төлөөллөөс бүрдүүлэх үндсэн зорилготой. Энэ нь ч МАН-ын шинэчлэлд тустай. Гаргасан шийдвэртээ би үргэлж баяртай байдаг гэжээ. 

---