Монгол-Солонгосын парламентын бүлгийн дэд дарга, УИХ-ын гишүүн Б.Бат-Эрдэнэтэй ярилцлаа.

УИХ-ын гишүүн Б.Бат-Эрдэнэ:

-БНСУ-руу манай улсын иргэд улирлын шинж чанартай 5-8 дугаар сард очиж ажилладаг. Нэг сард дунджаар зардлаа хасаад тооцвол таван сая төгрөг олж байна. Таван сарын хугацаатай ажиллаад ирэхэд 20-25 сая төгрөг олно. Гэтэл БНСУ-ын агентууд гэх хувийн хэвшлүүд орж ирээд нэг хүнээс 2500 ам.доллар авч байна. Өнөөдрийн ханшаар есөн сая төгрөг. БНСУ-д таван сар ажиллаж байгаа монгол ажилтан хоёр сарынхаа орлогыг дундын зуучлалын солонгос компаниудад тушааж байна. Энэ бол хоёр улсын хуулиар хөдөлмөрийн мөлжлөг хийж байгаа хэрэг. Үүнийг бид эсэргүүцэж байгаа учир Монгол-Солонгосын парламентын бүлэг, хоёр улсын Хууль зүй, дотоод хэргийн яаманд хандаж, хууль бус үйлдлийг таслан зогсоохыг  хүсэж байгаа.

Байгаль орчин аялал жуулчлалын сайдаар ажиллаж байхад 2022 оны аравдугаар сарын 1-нээс БНСУ-ын Яньян ОУНБ-аар Монгол Улсын иргэд визгүй зорчих боломжийг нээсэн. Анхны онгоцноос 18 зорчигч хууль бусаар харлаж үлдсэн. Ингээд визгүй зорчих харилцаа цуцлагдаагүй ч түр зогссон. Монголчууд Солонгос Улсад очоод харлахаа болчихвол визний нөхцөл сайжрахад бэлэн байгаа гэлээ. 

---