УИХ-ын чуулганы нэгдсэн хуралдаан эхэллээ. Өнөөдрийн хуралдааны эхэнд Зээлийн мэдээллийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн тогтоолын төслийг хэлэлцэж эхэллээ. Уг төслийг Улсын Их Хурлын гишүүн Э.Батшугар өргөн мэдүүлсэн юм.

Хуулийн төсөлтнэй холбогдуулж гишүүд асуулт асууж, хариулт авч байна.

УИХ-ын гишүүн Э.Болормаа:

-Хувь хүний мэдээлдэлтэй холбоотой асуулт асууя. Иргэн зээлийн оноогоо авъя гэхэд Sainscore.mn, Burenscore.mn гэсэн вэбсайт руу орж 1000 төгрөг төлөөд авах юм байна. Тусгай зөвшөөрөл эзэмшиж буй хоёрхон компани нь эд нар. Зээлийн түүх л гарч ирэхээс нэмэлт ямар нэгэн мэдээлэл байхгүй тул шууданчийн ажил л хийж буй газрууд байна. Миний гайхаж буй зүйл нь яагаад энэ хоёр байгууллагад миний санхүүгийн мэдээллийн түүх байгаа юм бэ. Монгол улсын бүх иргэдийн санхүүгийн мэдээлэл, зээлийн түүх энэ хоёр байгууллагад байгаа юм бол нөгөө хувь хүний нууцийн мэдээллийн хууль хаана үйлчлэх вэ? Тусгай зөвшөөрөл авсан гээд иргэний зөвшөөрөлгүйгээр санхүүгийн мэдээллийг өгч байгаа дээр ямар хяналт байна, хуулийн ямар зохицуулалт үйлчилж байгаа юм бэ?

Хууль санаачлагч, УИХ-ын гишүүн Э.Батшугар: 

-Санхүүгийн хэрэглэгчийн эрхийг хамгаалах хууль байхгүй. Бусад хөгжсөн улс оронд бүгдэд нь ийм үйлчилгээ үзүүлдэг байгууллага байдаг. Төв банкны тухай хуульд Санхүүгийн хэрэглэгчийн эрхийг хамгаалах ганц заалт л байдаг. Ийм байгууллага байгуулах цаг нь болсон. 1,7 сая иргэний мэдээллийг ямар байдлаар авсан талаарх мэдээллийг Монголбанк хариулаач.

Монголбанкны Тэргүүн дэд Ерөнхийлөгч Г.Энхтайван:

-Зээлийн мэдээллийн тухай хуулийн 5-ын 1-ын 2 дээр тухайн хэрэглэгч өөрийн мэдээллийг санд нийлүүлэх зөвшөөрлөө өгдөг. Таны мэдээлэл тэр санд орсон бол та зээл авахдаа зээлийн мэдээллийн гэрээн дээрээ зөвшөөрлөө өгчихсөн гэсэн үг. Төв банкны тухай хуульд Санхүүгийн хэрэглэгчийн эрхийг хамгаалах үндсэн функц бий. Хэрэглэгч үйлчилгээ авсны хүрээнд эрхээ хэрхэн хамгаалуулахад нь хяналт тавих үндсэн чиг үүргээ хэрэгжүүлэхээр Төв банкнаас зээлийн мэдээллийн үйл ажиллагаа эрхэлж байгаа дээрх хоёр байгууллагын үйл ажиллагаанд хяналт тавьж, зохицуулалт хийдэг. Улирал бүр хянаж байгаа гэв. 

---