Ерөнхий сайд Л.Оюун-Эрдэнэ УИХ-ын гишүүн Ж.Баярмааг "С.Баярцогтын хүн" хэмээн чуулганы хуралдааны танхимд зарлаж, үеэ өнгөрөөсөн улс төрчид залуучуудаар үгээ хэлүүлдэг бохир технологио хэрэглэх шаардлагагүй гэж хэлэв. 

УИХ-ын гишүүн Ж.Баярмаа "Ерөнхий сайд та зургаан жил өндөр дээд албан тушаал хашлаа. Хэтэрхий вакумжиж байна. Иргэдийн амьдралаас хэт тасраад байгаа юм биш үү" гэж шүүмжлэхэд Ерөнхий сайд "С.Баярцогт даргын асуултад хариулъя. Хөгжлийн банк, Стратегийн ордууд ямар үед хэний гараар ороод ямар боллоо. Өөртэй чинь юм ярихгүй. Залуу хүн байж хүний өмнөөс хачин юм ярилаа" гэж хэлсэн юм.

Үүний дараа УИХ-ын гишүүн Д.Жаргалсайхан ерөнхий сайдыг эмэгтэй хүнтэй хэт бүдүүлэг харьцлаа гэх шүүмжлэлийг хэллээ. Харин ерөнхий сайд Л.Оюун-Эрдэнэ түүнд дараах тайлбарыг өгөв. 

Монгол Улсын Ерөнхий сайд Л.Оюун-Эрдэнэ:

-Нэг гишүүнд хандаж хэлж байгаа хэрэг биш. Урьд нь энэ асуудал хэд хэдэн удаа давтагдаж байсан. Өөртэй ч уулзаж ярьж байсан. Үндэсний баялгийн сан бүрдүүлэхтэй холбоотой асуудалд зарчмын байр суурь өөр байгаа улс төрчдийн саад хийж байгаад л бухимдаж ингэж хэлсэн. Тэр хүмүүст хандаж хэлэхэд залуусыг өмнөө турхирах биш асуудал байвал ил тод гарч ирээд мэтгэлцээнээ хий. Стратегийн орд хэн эзэмшиж, үүний цаана ямар асуудлууд байгааг ч та бүхэн мэдэж байгаа. Энэ асуудал хавар намрын чуулганы хамгийн чухал сэдэв болно. Олон янзын зүйлс гарах байх. Цагаа өнгөрөөсөн улс төрчид өөрсдөө хэлж чадахгүй байгаа үгээ залуучуудаар хэлүүлэх бохир технологио хэрэглэх шаардлагагүй гэв. 

---